Әуежай Трамптың атымен аталып, оның алтын мүсіні кітапханаға қойылады

Associated Press хабарламасына сүйенген Aikyn.kz жеке тұлғаға табынудың «америкалық үлгісін» түсіндіреді.

Дүйсенбі күні (30 наурыз) Флорида әуежайына президент Дональд Трамптың аты берілетіні белгілі болды. Бұл шешімнен бірнеше сағат өткен соң Ақ үй басшысы Майамиде өзінің президенттік кітапханасын орналастыру жоспарланған зәулім ғимараттың құрылысы басталатынын жариялады.

Флорида губернаторы Рон Десантис Палм-Бич халықаралық әуежайын президент Дональд Дж. Трамп атындағы халықаралық әуежай деп атауға мүмкіндік беретін заңға қол қойды. Атауды өзгерту шілдеде күшіне енеді. Осылайша, Мар-а-Лагодағы Трамптың жеке резиденциясына жақын орналасқан әуежайдың атауы ресми түрде өзгертіледі.

Сол күні кешке жақын Дональд Трамп әлеуметтік желілерде видео жариялады. Онда болашақ президенттік кітапхананың цифрлық эскиздері көрсетілді. Видеода Майамидің көкжиегінен асқақтай көтерілген мұнара көрсетілген, оның сыртында «Trump» деген  жазу бар.

Видеода мұнараның сыртқы және ішкі көріністері панорама түрінде берілген. Вестибюльде президенттік ұшақ тұр, жанында Трамп 2015 жылы президенттік науқанын бастағанда түскен, алтын эскалаторға ұқсас эскалатор қойылған. Басқа кадрларда Ақ үйде салынатын алып банкет залы, Сопақша кабинеттің көшірмесі, шатырдағы бақтар және Трамптың үлкен алтын мүсіні көрсетіледі. Жобаны Майамидегі Bermello Ajamil компаниясы әзірлегені жазылған. Трамп видеоны еш түсіндірмесіз жариялаған, тек кітапхананың жаңа сайтына сілтеме береді. Сайтта «жақында қолжетімді болады» деген жазу және қайырымдылық жасауға арналған сілтеме бар.

Майами-Дейд колледжі болашақ кітапхана үшін қала орталығынан шамамен 1,2 гектар жер телімін сыйға берген. Желтоқсанда судья бұндай сыйға тартуды даулаған талап-арызды қанағаттандырмаған болатын. Талап қоюшылардың айтуынша, колледж кеңесі қоғамдық хабарландыруды жеткілікті деңгейде жасамаған. Учаскенің құны 67 миллион доллардан асады деп бағаланады.

Бұған дейін Дональд Трамптың ұлы Эрик кітапхана «қазірге дейін салынған ең әсем ғимараттардың бірі болады» және «Майами көкжиегіндегі символға айналады» деп мәлімдеген.

Бір қызығы, Ақ үйге қайта оралғаннан бері Трамп АҚШ-тағы түрлі мекемелерге өз есімін беруді күшейтті.  АҚШ Бейбітшілік институтынан және Кеннеди атындағы өнер орталығына өзінің есімін берді, енді 100 долларлық банкноттарға қолтаңбасын орналастырмақ. Палм-Бичте әуежайдан Трамптың резиденциясына апаратын жолдың бір бөлігі жақында Дональд Дж. Трамп бульвары деп қайта аталды.