Аустралия кеме жасау зауытын құруға қомақты қаржы бөледі

2021 жылы енгізілген AUKUS бағдарламасы ел тарихындағы ең ірі қорғаныс инвестициясы болды. Бағдарлама аясында 2027 жылдан бастап бұл елде АҚШ-тың Вирджиния класындағы сүңгуір қайықтары орналастырылады. Сонымен қатар 2030 жылдан бастап Аустралияға бірнеше осындай суасты қайықтары сатылмақ. Одан бөлек Ұлыбритания мен Аустралияның атомдық суасты қайықтарының жаңа буынын бірлесіп әзірлеу мен өндіруді де жоспарлап отыр. 

Аустралия премьер-министрі Энтони Албанесе Оңтүстік Аустралияның Аделаида қаласындағы Осборн кеме жасау зауытына 3,9 миллиард аустралиялық доллар көлемінде бастапқы инвестиция жасалатынын хабарлады. Ол бұл қаржыландыруды Аустралияның ядролық сүңгуір қайықтар флотын құру үшін маңызды деп атады. 

Ресми деректерге сәйкес, жобаның жалпы құны алдағы бірнеше онжылдықта 30 миллиард аустралиялық долларға жетуі мүмкін. 

Қазіргі уақытта Осборнде AUKUS келісімінің негізгі құрамдас бөлігі саналатын аустралиялық ядролық сүңгуір қайық флотының құрылысына жауапты ASC компаниясы мен британиялық BAE Systems компаниясының бөлімшелері жұмыс істейді. Кеме жасау зауытында негізгі құрылыс жұмыстары басталмас бұрын, Коллинз класындағы сүңгуір қайықтарға техникалық қызмет көрсету жұмыстарының негізгі бөлігі атқарылады. 

Оңтүстік Аустралияның премьер-министрі Питер Малинаускас бөлінген қаражат инфрақұрылымды дамытуға бағытталатынын атап өтті. Бұл инфрақұрылым ядролық суасты қайықтарын жасау және қызмет көрсету үшін қажетті жағдайларды қамтамасыз етеді.

Бұдан бұрын Аустралия жағажайлары акула шабуылдарына байланысты жабылғанын жазғанбыз.