Азия чемпионы Әлихан Әскербайға ректор гранты табысталды

Жуырда І.Жансүгіров атындағы Жетісу университетінің студенті Әлихан Әскербай Манама қаласында өткен ауыр атлетикадан жасөспірімдер арасындағы Азия чемпионатында өнер көрсетіп, екі рет әлем рекордын жаңартты, – деп хабарлайды Aikyn.kz.

Ол жұлқа көтеруде 144 келі, ал серпе көтеруде 172 келіні еңсерді. Екі нәтиже де жасөспірімдер арасында әлем рекорды болып тіркелді. 

71 келіге дейінгі салмақ дәрежесінде өнер көрсетіп, алтыннан алқа таққан Әлихан Әскербайды бүгін басқарма төрағасы-ректор Ермек Бөрібаев құттықтап, Жетісу университетінде тегін білім алуы үшін грант серификатын табыстады.

«Білім ордасында еліміздің мерейін  үстем еткен Әлихандай спортшы студент барына мақтанамыз. Қазақстанның көк байрағын әлемдік ареналарда желбіретіп, абыройын асқақтатты. Өзі білім алып жатқан университетінің имиджін көтерді. Мен болашақта Әлиханның Олимпиада ойындарына қатысып, чемпион атанатынына сенемін. Осы жолда жас чемпионға сәттілік тілеймін, еліміздің мақтанышына айналған бала тәрбиелегені үшін ата-анасына алғыс айтамын», - деді ректор.

Әлихан Сарқант қаласының тумасы. Көпбалалы отбасынан шыққан. Ата-анасы қарапайым еңбек адамдары. Әлиханды анасы алты жасынан Сарқандағы спорт мектебіне апарып,  ауыр атлетика секциясына береді. 

Ауыр атлетика ерік пен табандылықты, төзім мен еңбекқорлықты талап ететін спорт түрі. Осы қасиеттерді Әлиханның бойынан байқаған  жаттықтырушысы Нұрболат Жаманқызов оған ерекше көңіл бөледі. Аудандық, қалалық, облыстық, республикалық байқауларға қатыстырып, жас спортшыны әбден шыңдайды. Ұстаз үмітін ақтай білген Әлихан Азия чемпионатында ауыр атлетикадан жасөспірімдер арасында рекорд орнатып, жеңіс тұғырынан көріне білді.

Жетісу университетінде өткен жиынға Әлиханың анасы Нұргүл Серікбаева арнайы келді. Баласына көрсетілген құрметке, төрт жыл бойы Жетісу университетінде грант негізінде білім алуға мүмкіндік бергені үшін университет ректорына,  ұжымға,  оқытушылар мен жаттықтырушыларға шынайы алғыс білдірді.

«Мен көпбалалы анамын. Балаларымның барлығы спортпен айналысады. Әлиханымның үлкен додаға қатысуына қолдау көрсетіп, оның жеңісін ескеріп, білім грантын ұсынғандарыңызға қатты қуанып тұрмын. Бұл біздің отбасымыз үшін үлкен көмек. Алдағы уақытта да балам Жетісу университетінің, еліміздің  абыройын көтереді деп  сенемін», - деді. 

Әлихан спорттағы жарқын жеңісімен замандастарына үлгі болып отыр.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.