БАӘ ең көп ізделген үш қылмыскердің бірін ирландиялық есірткі бароны деп болжанған адамды экстрадициялады

Жексенбі күні Дублинде прокурорлар Ирландиядағы есірткі картелінің жетекшісі делінген Даниэль Кинаханға айып тақты. Атап айтқанда, ол Ұлыбритания, Еуропа және АҚШ-та әрекет еткен есірткі контрабандасы мен ақшаны жылыстатудың халықаралық желісін құрды деп айыпталып отыр, деп хабарлайды Tengrinews.kz Reuters агенттігіне сілтеме жасап.

2022 жылы АҚШ билігі Кинаханды ұйымдасқан қылмыстық топтың үш жетекшісінің бірі деп атаған болатын. АҚШ әкімшілігі оларды тұтқындауға көмектесетін ақпарат үшін 5 миллион доллар сыйақы тағайындаған.

Жексенбі күні таңертең Дубайда Кинахан Ирландия билігіне тапсырылып, үкіметтік ұшақпен Дублин шетіндегі әскери базаға жеткізілді. Осыдан кейін ол бірден сотқа апарылып, жексенбі кешіндегі кезектен тыс отырыстан кейін қамауға алынды.

Бұқаралық ақпарат құралдарының хабарлауынша, қауіпсіздікті қамтамасыз ету мақсатында ауқымды операция жүргізілген. Хаттама аясында қарулы полиция, әскери қызметшілер және пенитенциарлық қызмет жұмылдырылған. Айта кетерлігі, аталған қызмет жақында ұйымдасқан қылмысқа қатысы бар күдіктілерді, террористерді және басқа да аса қауіпті тұтқындарды тасымалдау үшін жарылысқа төзімді броньды автокөлік сатып алған.

Кинахан сотта өзіне тағылған айыптарды түсінетінін мәлімдеді. Ал үш судьяның бірі оған кепілмен босату туралы өтінішті тек Жоғарғы сот арқылы беруге болатынын ескертті.

"Маған кепілдік берілмейтінін білемін деп ойлаймын, бірақ түсіндіргендеріңізге рақмет", - деп жауап берді ол.

Alleged Irish crime gang boss Daniel Kinahan was charged with directing a criminal organization by prosecutors in Dublin amid tight security at a special court sitting following his extradition from the United Arab Emirates https://t.co/hQUBu20Mep pic.twitter.com/bQukMtJcl3

— Reuters (@Reuters) August 9, 2026

Тыңдау Дублиннің Арнайы қылмыстық сотында өтті. Бұл сотта терроризм және ұйымдасқан қылмысқа қатысты істер алқабилердің қатысуынсыз қаралады.

49 жастағы Кинахан адвокатының жоқтығы үшін кешірім сұрап, жұмадан бері Дубайда оқшаулауда болғандықтан ештеңе ұйымдастырып үлгермегенін айтты; ол отбасы мүшелерінің бірі қорғаушы тауып береді деп үміттенген.

Төрт жыл бұрын АҚШ Кинаханның тобын ірі трансұлттық қылмыстық ұйым деп танығанда, оны әлемдегі ең танымал қылмыстық желілермен салыстырған болатын.

Сол кезде Ирландия полициясы 1990-жылдары Дублинде героин мен кокаин саудасынан бастаған банданың қазір бүкіл Еуропа бойынша әрекет ететінін мәлімдеді.

Жексенбі күні БАӘ мен Ирландияның әділет министрлері жариялаған бірлескен мәлімдемеде Кинахан трансұлттық ұйымдасқан қылмысқа байланысты қылмыстық жауапкершілікке тартылуы тиіс ең танымал тұлғалардың бірі ретінде аталды.

Google News арқылы жаңалықтарымызды қадағалаңыз