Байтақ партиясы сайлауалды үгіт насихатты эко марафонмен бастады

Іс-шара таңғы сағат 7:00-де Астанадағы Триатлон саябағында өтті. Марафонға 200-ден астам адам қатысты. Олардың қатарында партия мүшелері, кандидаттар, белсенділер және экологиялық бастамаларды қолдаушылар болды.

Ұйымдастырушылар акцияның таңғы уақытқа жоспарлануының өзіндік сыры бар дейді. Бұл уақытта қалада көлік қозғалысы аз, демек қоршаған орта мен ауа барынша таза болады. Эко-марафонды партия төрағасы Азаматхан Әміртаев бастап берді. Қатысушылар 2,5 шақырым қашықтықты жүгіріп өтті.

«Байтақ» партиясының басты мақсаты – таза ауа, таза су, таза жер және таза адами қарым-қатынас. Біз «Таза Қазақстан» идеясын қолдаймыз. Таңғы жүгіру – мықты денсаулықтың жарқын үлгісі. Сондықтан экологиялық құндылықтарды насихаттаумен қатар, халықты салауатты өмір салтына шақыру маңызды деп санаймыз», – деді партия төрағасы.

Шара барысы домбыраның сүйемелдеуімен жалғасты. Қатысушылар «Адай», «Сарыарқа», «Балбырауын» сынды танымал күйлерді нақышына келтіріп орындады. Партия төрағасы «біз осылайша ұлттық құндылықтарды дәріптеуге де ерекше мән беруге тырыстық», – деді. 

«Байтақ» – алдағы саяси додаға елдегі алғашқы әрі жалғыз экологиялық партия ретінде түіс отыр. Оның сайлауалды бағдарламасында таза ауа мен су, азаматтардың денсаулығы, қолжетімді медицина, азық-түлік қауіпсіздігі, өңірлердің тұрақты дамуы және «жасыл» экономика арқылы жаңа жұмыс орындарын құру мәселелері қамтылған.

Құрылтай депутаттарының сайлауы 23 тамызда өтеді. Саяси бәсекеге «Байтақ» жасылдар партиясы 47 кандидат ұсынған.