Бала мүгедек болып қалды : Маңғыстаулық әйел балабақша қызметкерлерін жауапқа тартуды талап етті

Фото: envato.com

Анасының айтуынша, оқиға 2025 жылғы 9 қыркүйекте болған. Сол күні бес жасар Қайсар балабақша ауласында ойнап жүрген кезде темір әткеншек оң көзіне соғылып, ауыр жарақат алған.

Жанар Көмекбаеваның сөзінше, оқиғадан кейін балаға дер кезінде алғашқы медициналық көмек көрсетілмеген. Ол тәрбиеші жарақат алған баланы жұбатудың орнына оған күш қолданғанын да алға тартады. Сонымен қатар, анасы балабақша қызметкерлері болған жағдайды бастапқыда жасырмақ болды деп есептейді.

Атырауда бүлдіршінді тепкен тәрбиеші жұмыстан қуылды

Оның мәліметінше, балаға бірнеше сағат бойы медициналық көмек көрсетілмеген. Ал оқиға туралы оған тәрбиешінің өзі емес, кейін ауысымға келген басқа қызметкер хабарлаған.

Анасының айтуынша, жарақат салдарынан Қайсардың зақымданған көзінің көру қабілеті 4 пайызға дейін төмендеген. Екінші көзінің көруі де 50 пайызға нашарлаған. Әйел осы жағдайдың салдарынан ұлына мүгедектік рәсімделгенін мәлімдеді.

Ақтөбеде батут паркінде секірген бала мүгедек болып қалды

Жанар Көмекбаева сот-медициналық сараптаманың жарақатты денсаулыққа орташа ауырлықтағы зиян ретінде бағалауымен келіспейді. Ол баланың денсаулығына келтірілген зиян ауыр дәрежеде деп танылуға тиіс деп санайды.

Белгілі болғандай, 2026 жылдың сәуір айында қылмыстық іс қайта сараптамаға жолданған. Әйелдің айтуынша, аудандық прокуратура мен тергеу органдары қорытынды мамыр айының басында дайын болатынын хабарлаған. Алайда 12 маусымдағы жағдай бойынша сараптама нәтижесі әлі жарияланбаған.

Ақмоладағы балабақшада болған жанжал: Тәрбиеші жұмыстан шығарылды

Осыған байланысты Жанар Көмекбаева Қазақстан Республикасының Бас прокуратурасына және құқық қорғау органдарының басшылығына үндеу жасап, істің қаралуын жеделдетуді сұрады. Сондай-ақ ол тәрбиешінің, балабақша басшылығының, медицина қызметкерінің және істі тергеп жатқан жауапты тұлғалардың әрекетіне құқықтық баға беруді талап етті.