Бала сабаққа мектеп формасынсыз келді мектеп не істеуге құқылы

Қазақстанда мектеп формасы талаптарына сәйкес келмегені үшін баланы сабаққа кіргізбей қоюға болмайды. Дегенмен, белгіленген ережені жүйелі түрде бұзғаны үшін ата-аналарға алдымен ескерту жасалып, кейін айыппұл салынуы мүмкін. Бұл туралы Орталық коммуникациялар қызметінде өткен баспасөз мәслихатында айтылды, деп хабарлайды Tengri Education тілшісі.

Оқу-ағарту бірінші вице-министрі Шынар Ақпарова балаларды оқу процесінен шеттетуге қатаң тыйым салынатынын атап өтті. "Білім туралы" заңға сәйкес, әрбір бала сапалы білім алуға құқылы, сондықтан мектеп оқушының сырт келбеті белгіленген стандарттарға сай келмесе де, оған есігін жаба алмайды.

"Бала сапалы білім алуға құқылы. Сондықтан баланы мектепке кіргізбеуге жол берілмейді, бұлай істеуге болмайды", - деді вице-министр ОКҚ брифингінде.

Сонымен қатар ведомство өкілдері Конституция бойынша Қазақстан заңдарын сақтау барлық азаматтың міндеті екенін еске салды.

Мектеп формасына қойылатын талаптардың артында нақты заңнамалық нормалар тұр:

"Білім туралы" заңның 47-бабы - білім алушылардың құқықтары мен міндеттерін айқындайды; Осы заңның 49-бабы - ата-аналардың (баланың заңды өкілдерінің) құқықтары мен міндеттерін бекітеді.

Осы нормаларға сәйкес, ата-ана нақты білім беру ұйымында бекітілген мектеп формасының сақталуын қамтамасыз етуге міндетті. Бұл ретте киімге қойылатын талаптарды мектеп әкімшілігі жеке өзі емес, ата-аналар қауымдастығымен және қамқоршылық кеңеспен бірлесіп белгілейді.

Шынар Ақпарованың айтуынша, мектеп формасы ережелерін елемеу фактісі назардан тыс қалмайды. Бекітілген нормаларды жүйелі түрде бұзғаны үшін әкімшілік жауапкершілік қарастырылған - алдымен ескерту, содан кейін 5 АЕК (2026 жылы 21 625 теңге) көлемінде айыппұл салынады.

Бұған дейін Қазақстанда мектеп формасына қатысты талаптар түсіндірілген болатын. Ата-аналарға киім үлгісін кім анықтайтыны, оны қайдан сатып алуға болатыны және отбасыларға қандай көмек көрсетілетіні туралы айтылды.

Мектеп киімі баланың оқу күніндегі жайлылығына айтарлықтай әсер етеді. Форманы қалай дұрыс таңдау керек және не нәрсеге назар аударған жөн - бұл туралы мына материалдан оқыңыз.

Google News арқылы жаңалықтарымызды қадағалаңыз

Жазылу