Банктер ортақ QR кодқа өтуге міндеттелмек

Келесі жылы барлық банктер ортақ QR кодқа көшеді. Яғни азаматтар кез келген банктің мобильді қосымшасымен төлем жасай береді деген сөз. 

Бұл туралы Ұлттық банк төрағасының кеңесшісі – цифрлық трансформация жетекшісі Бинұр Жәленов мәлімдеген болатын. Бұл елдегі қаржы нарығына қалай әсер етеді? 

Қазақстанда ортақ QR ресми түрде іске қосылды. Бұл жүйені жасақтауға бес жыл уақыт кеткен. Енді кез келген банк қосымшасын қолданып барлық терминал арқылы төлем жасауға болады. 

Бинұр Жәленов, Ұлттық банк төрағасының кеңесшісі - цифрлық трансформация жетекшісі: 

- Банктер арасындағы мобильді аударымдар мен ортақ QR кодты жетілдіру бойынша жұмыстар жүріп жатыр. Бүгінде 9 банк өзара мобильді аударымдар жүйесіне, 6 банк ортақ кьюар код жүйесіне қосылды. Бұл жүйеге барлық банктер тіркеледі. Ортақ келісім бар. Менің ойымша, 2026 жылдың бірінші тоқсанының соңына дейін тұтынушылар бұл қызметті пайдалана алады. Ал нақты қай банк, қашан қосылатыны туралы әр мекеме жеке хабарлайды. 

Қазір бұл жүйеге Halyk Bank, Bank RBK, Altyn Bank, Home Credit Bank, Freedom Bank және ЦентрКредит банкі секілді алты ұйым тіркелді. Жыл соңына дейін ForteBank, «Қазпошта» мен Alatau City Bank та қатарға қосылмақ. Kaspi банкпен келісім жасалған. Енді техникалық жұмыстар жүргізіліп жатыр. себебі банктердің базалары әртүрлі.

Банкаралық QR жүйесіне қосылғандар

Halyk Bank

 Bank RBK

Altyn Bank

Home Credit Bank

Freedom Bank

ЦентрКредит Банкі

Айбар Олжай, сарапшы:

- Сосын банктің ақпараттық системасы. Біреуде колвер бар, біреуде абис бар. Олардың барлығын бір жерге, бір шлюзға біріктіру жұмыстары керек. Шынын айтқанда негізгі екі банк өзінің QR системасын жақсартуға көбірек инвестиция құйған болатын. Ол кіші банктерге тиімді. Үлкен банктер өзінің инвестиция салған технологияларын беріп қояйын деп тұрған сияқты.  

Сондықтан ірі банктер алғашында ортақ жүйеге қосылуға құлықсыз болды. Дегенмен сарапшылар бұл шара қаржы секторының қауіпсіздігі үшін маңызды деген пікірде.

Арман Бейсембаев, қаржыгер:

- Мемлекет нарықта монополия болмауын қадағалауы тиіс. Қазір елімізде технологиялық жағынан алға кетіп қалған санаулы банк бар. Олар сол басымдықтарын пайдаланып басқа ойыншыларды нарықтан ысырып шығарады. Бұл өте қауіпті. Егер ертең монополист банк қиындыққа тап болса елдің қаржы секторы ауыр соққы алады. Ондай болмаған күннің өзінде нарықты толық жаулап алған соң мекеме дамудың орнына артқа кетуі мүмкін. Сондықтан бәсеке үнемі тең дәрежеде болуы керек.

Болашақта бұл ортақ жүйеге қосылу міндетті болуы мүмкін. Банк туралы заңға Ұлттық цифрлық қаржы инфрақұрылымы туралы бөлім арналмақ.

Авторы: Серік Селеубайұлы