Бірыңғай QR жүйесіне қосылған банктер саны артты

Қазақстанда бірыңғай банкаралық QR-төлем жүйесін енгізу жаңа кезеңге өтті. Алғаш рет 2024 жылы екі банктің қатысуымен пилоттық режимде іске қосылған жоба бүгінде қаржы нарығындағы негізгі инфрақұрылымдардың біріне айналып келеді.

Қазіргі таңда бірыңғай QR төлем экожүйесіне 12 қаржы ұйымы қосылған. Олардың қатарында Freedom Bank, Halyk Bank, Eurasian Bank, ForteBank, Банк ЦентрКредит, Altyn Bank, Alatau City Bank, Nurbank, Bereke Bank, Bank RBK, Home Credit Bank және KMF бар.

Жобадағы келесі маңызды кезең – Kaspi Bank-тің жүйеге қосылуы. Мәліметке сәйкес, банк 2026 жылғы 19 шілдеге дейін бірыңғай QR инфрақұрылымына толық интеграциялануы тиіс. Бұл қадам төлем нарығын ортақ стандартқа келтіріп, банкаралық QR төлемдерінің толыққанды жұмыс істеуіне мүмкіндік береді.

Ұлттық банк бұған дейін банктердің техникалық интеграция мен деректер қауіпсіздігін қамтамасыз ету бағытындағы жұмыстарды аяқтауға жақындағанын мәлімдеген болатын.

Бастапқы жоспар бойынша, 2026 жылдың бірінші тоқсанының соңына дейін елдегі барлық екінші деңгейлі банк бірыңғай QR жүйесіне қосылып, клиенттерге толық қызмет көрсетуі қажет еді.

Алайда интеграция қарқынының баяулауына байланысты 2026 жылдың наурызында Мемлекет басшысы ірі банктерге банкаралық QR-төлемдер мен цифрлық теңгені енгізуді кешіктіргені үшін сын айтқан болатын.