Баспана, балабақша, спорт кешені: Екібастұзда кәсіпорын жұмысшыларына әлеуметтік нысандар салынады

Оның айтуынша, Павлодар облысында Самұрық-Энерго тобының негізгі кәсіпорындары орналасқан. Өңірдегі қызметкерлер саны шамамен 11 мың адамға жетеді.

— Сондықтан компания өзінің әлеуметтік жауапкершілігін сезінеді. Осыған байланысты Екібастұз қаласында қызметкерлерге арналған көпқабатты тұрғын үй, екі балабақша, спорт кешенін салу туралы шешім қабылданды. Жобалардың жалпы құны шамамен 20 млрд теңге, — деді Қайрат Мақсұтов Үкіметтің бүгінгі отырысында.

Бұл нысандар Павлодар облысы әкімдігімен жасалған меморандумға сәйкес, үш жыл мерзімде салынады.

Сондай-ақ, «Таза Қазақстан» бағдарламасы бойынша, «Самұрық-Энерго» экологиялық ахуалды жақсарту үшін қаланы көгалдандыруға жыл сайын 100 млн теңгеден астам қаржы бөледі.

Бұған дейін Қайрат Мақсұтов Екібастұз ГРЭС үшінші энергоблогы 2028 жылы іске қосылатынын айтқан еді. Жаңа энергоблоктардың іске қосылуы қуат тапшылығын жауып қана қоймай, деректерді өңдеу орталығын, процессорды салқындату жүйелерін дамытуға мүмкіндік береді.