Батыс Қазақстанда газ өндірісі 4 еседен астам төмендеді: қыркүйектегі жағдай

Қазақстанда тауарлық газ өндіру көлемі қыркүйек айында соңғы кемінде 15 жылдағы ең төменгі деңгейге дейін құлдырады. Бір айдың ішінде өндіріс көлемі 4 еседен астам қысқарған. Бұл туралы Data Hub хабарлады.

ҚР Стратегиялық жоспарлау және реформалар агенттігінің Ұлттық статистика бюросының мәліметінше, қыркүйек айында елде 0,5 млрд текше метр тауарлық газ өндірілген. Ағымдағы жылдың тамыз айымен салыстырғанда көрсеткіш 4,3 есе, ал былтырғы қыркүйекпен салыстырғанда 3,3 есе төмендеген.

Сарапшылардың атап өтуінше, бұл — 2011 жылғы қазаннан басталған қолжетімді бақылаулар тарихындағы абсолютті минимум.

Өндіріс көлемінің күрт төмендеуіне елдегі ең ірі мұнай-газ кен орындарының бірі — Қарашығанақта жүргізілген жоспарлы жөндеу жұмыстары басты себеп болған.

Тарихи тұрғыдан алғанда, Қазақстандағы тауарлық газ өндірісінің жалпы көлемінің 80 пайыздан астамы Батыс Қазақстан облысына тиесілі. Қыркүйек айында өңірдегі көрсеткіштер айтарлықтай төмендеген:

Батыс Қазақстан облысында тауарлық газ өндіру көлемі 370 млн текше метрге дейін қысқарды. Бұл тамыз айындағы көрсеткіштен 5,5 есе, ал өткен жылдың сәйкес кезеңімен салыстырғанда 4,2 есе аз.

Батыс Қазақстан облысында мұнай өндіру көлемі 206 мың тоннаға дейін төмендеді. Тамыз айымен салыстырғанда 4,9 есе, ал былтырғы көрсеткішпен салыстырғанда 3,9 есе қысқарған.

Қарашығанақ кен орнындағы өндіріс тоқтатылар алдында жоспарлы алдын алу және жөндеу жұмыстары жүргізілген болатын. Техникалық қызмет көрсетуге байланысты ай қорытындысы бойынша мұнай өндіру көлемі шамамен 450 мың тоннаға уақытша төмендейді деп күтілген.

Ал жөндеу жұмыстары кезеңінде тауарлық газ өндіру көлемі қандай болатыны туралы ресми болжам бұған дейін жарияланбаған.

Бүгін, 16:39