Шектеулі ақпарат: Ұлттық экономика министрлігі депутаттардың жалақысын жариялаудан бас тартты

Қазақстанда өткелі жатқан кезектен тыс мәслихат сайлауы қарсаңында Ұлттық экономика министрлігі депутаттардың еңбекақы мөлшері туралы ақпаратты айтудан бас тартты. Ведомство ресми сауалға берген жауабында бұл мәліметтердің заңды түрде шектеулі ақпарат санатына жататынын алға тартты, деп жазады nur.kz.

Елдегі мәслихат төрағалары мен тұрақты комиссия басшылары өз қызметін тұрақты негізде атқарады. Мәслихат төрағасын депутаттар ашық не жасырын дауыс беру арқылы сайлайды. Сондай-ақ облыстық және қалалық мәслихаттарда екі адамнан аспайтын тұрақты комиссия төрағалары қызмет етеді. Олар бір саяси партияның өкілдері болмауға тиіс және өкілеттігі мәслихат мерзімімен шектеліп, қатарынан екі реттен артық сайлана алмайды.

Ал қалған депутаттар сессиялар, комиссия отырыстары немесе біліктілікті арттыру курстары кезінде негізгі жұмысынан уақытша босатылады. Бұл күндері олардың орташа жалақысы мен іссапар шығындары жергілікті бюджет есебінен өтеледі. Заңнамаға сәйкес, депутаттың жалақысы өзі орналасқан қала немесе облыс әкімі аппараты басшысының лауазымдық жалақысынан жоғары болмауы керек.

Алайда министрлік үкімет қаулысын негізге алып, депутаттар мен мәслихат төрағаларының нақты қанша еңбекақы алатынын жарияламады.

«Мәслихат депутаттарының жалақысы туралы деректер шектеулі қолжетімді ақпаратқа жатады. Осыған байланысты мәслихат төрағалары мен депутаттарының лауазымдық жалақысының мөлшері туралы ақпарат беру мүмкін емес», – делінген Ұлттық экономика министрлігінің жауабында.

Еске салсақ, Қазақстанда бір айдан кейін барлық деңгейдегі мәслихат депутаттарының кезектен тыс сайлауы өтеді.

Бүгін, 16:35