Бавария футболшысы Джамал Мусиала бір аптаның ішінде екінші рет есінен танып қалды

«Бавария» клубының жартылай қорғаушысы Джамал Мусиала бір апта ішінде екінші рет жолдастық кездесуде алаңда есінен танып қалды, – деп хабарлайды Aikyn.kz сайты.

18 тамызда «Бавария» жолдастық кездесуде «Хайденхаймды» 4:2 есебімен жеңді. Мусиала ойынға 61-минутта Исмаэль Сайбаридің орнына шыққан. Арада алты минут өткенде 23 жастағы футболшы алаңның ортасында кенеттен құлап қалды.

Екі команданың ойыншылары бірден Мусиаланың жанына жиналып, алаңға медициналық қызметкерлер шақырылды. Алғашқы көмек көрсетілгеннен кейін неміс футболшысы орнынан тұра алды. Алайда ол алаңнан жаттықтырушылар штабының қызметкерінің көмегімен шықты.

Мусиала үшін бұл бір аптадағы осындай екінші жағдай. 15 тамызда ол «Лейпцигке» қарсы жолдастық кездесуде де өзін жайсыз сезініп, есінен танып қалған еді. Ол матчта «Бавария» 3:1 есебімен жеңіске жеткен. Сол кезде Мусиала 83-минутта гол соғылғаннан кейін алаңда өзін нашар сезінген. Бұған Мюнхендегі 30 градустан асқан аптап ыстық себеп болуы мүмкін деген болжам айтылған.

Ал бұл жолғы жағдайдың нақты себебі әзірге белгісіз. Клуб тарапынан футболшының денсаулығына қатысты қосымша ақпарат жарияланған жоқ.

Джамал Мусиала «Бавария» сапында 2020 жылдан бері өнер көрсетіп келеді. Осы уақыт аралығында ол Германияның алты дүркін чемпионы атанып, ел кубогын, УЕФА Суперкубогын және клубтар арасындағы әлем чемпионатын жеңіп алды.