Бектенов Абай облысы әкімінің орынбасарын жазалауды тапсырды

Абай облысында жылу желілерін жылыту маусымына дайындау жұмыстарының кешігіп жатқаны анықталды. Премьер-министр Олжас Бектенов облыс әкімінің осы салаға жауапты орынбасарын тәртіптік жауапкершілікке тартуды тапсырды, деп хабарлайды Tengrinews.kz тілшісі.

Семейде жұмыс кестеден кешігіп тұр

Премьердің айтуынша, бұл мәселе Семей қаласында тіркелген. Осыған байланысты ол Абай облысы әкімінің тиісті салаға жетекшілік ететін орынбасарын тәртіптік жауапқа тартуды тапсырды.

"Бір өңірден басқасының бәрі тапсырманы дәл мерзімінде орындады. Осыған байланысты Семей қаласының жылу желілерін дайындау кезінде тиісті үйлестіру жұмыстарының болмауы мен дайындықтың кешіктірілуі үшін Абай облысы әкімінің жетекшілік ететін орынбасарын тәртіптік жауапкершілікке тартуды тапсырамын", – деді Олжас Бектенов.

Әкімдік сайтындағы мәліметтерге сүйенсек, жылумен жабдықтау және жылыту мәселелеріне облыс әкімінің орынбасары Бекжан Бапышев жетекшілік етеді.

Абай облысы әкімдігі сайтынан алынған скриншот

Сонымен қатар Олжас Бектенов өңір әкімдеріне жылыту маусымынан өту жөніндегі өңірлік штабтардың жұмысын жандандыруды және энергия көздерінің жұмысын ұдайы тексеріп тұруды тапсырды.

"Жоспарлы параметрлердің бәрі сақталуы керек, сондай-ақ отынның нормативтік қоры мен қосалқы жабдықтардың дайындығын қамтамасыз ету қажет. Халыққа қажетті көмір бағасын тұрақты бақылауда ұстап, отын тапшылығына жол бермеңіздер", – деп тапсырды премьер-министр.

Бұған дейін Бектенов коммуналдық инфрақұрылымды жаңғырту жұмыстарының кешеуілдеуіне байланысты Алматы облысының әкімі Марат Сұлтанғазиевті қатаң сынға алған болатын.

Еске сала кетейік, премьер бұған дейін де қысқа дайындық жұмыстарының сәтсіздікке ұшырағаны үшін жазаланатынын ескерткен еді. Ол жылыту маусымына дайындық кезінде нысандарды жөндеуді кешіктірген немесе сапасыз орындаған басшылардың жауапкершілігін қарауды тапсырды.

Бізді Google-дың негізгі дереккөздер тізіміне қосыңыз