Бектенов БҚО да мұнай газ саласының даму қарқынын бағалады

ҚР Премьер-министрі Олжас Бектенов Батыс Қазақстан облысына жұмыс сапары барысында Мемлекет басшысының мұнай-газ саласын дамыту жөніндегі тапсырмаларының орындалу барысымен танысты. 

Бөрлі ауданында ол Қарашығанақ және Чинарев мұнай-газ конденсаты кен орындарын аралап, жұмыс істеп тұрған өндірістерді жаңғырту, олардың жүктемесін арттыру, жергілікті қамту үлесін көбейту, кадрлар даярлау және басқа да маңызды мәселелерге назар аударды. 

Қарашығанақ қайта өңдеу кешенінде мұнай конденсатын тұрақтандыру, тазарту және қайта өңдеу процестерімен танысты. Бұл нысан Қарашығанақ кен орнының негізгі өндірістік құрамына кіреді және 279 млн тонна мұнай мен 785 млрд текше метр газдың алуға болатын қалдық қорымен әлемдегі ең ірі кен орындарының бірі саналады.

«Қарашығанақ Петролиум Оперейтинг Б.В.» компаниясының бас директоры Марко Марсили Премьер-министрге өндірістік көрсеткіштер мен келешегі бар жобалар туралы, сондай-ақ әлеуметтік жауапкершілік шеңберінде қабылданып жатқан шаралар жөнінде баяндады. 

2024 жылы Қарашығанақта өндіру көлемі 12,2 млн тоннаны құраса, 2025 жылға арналған жоспар – 12,4 млн тонна. Қарашығанақты кеңейту жобасының (ПРК-1А) бірінші кезеңі іске қосылып, газ айдау тиімділігі арттырылды және өндірістік процестердің тұрақтылығы қамтамасыз етілді. Нәтижесінде ішкі нарыққа 7,5 млрд текше метр газ жеткізілді, бұл Қазақстандағы жалпы көлемнің шамамен 26%-ын құрайды.

Бәйтерек ауданында Премьер-министр «Жайықмұнай» ЖШС-ның тауарлық газды қайта өңдеу қуатымен танысты. Чинарев кен орны аумағында теміржол мұнай құю терминалы, газ құбыры, вахталық қалашықтар және басқа да инфрақұрылымдар дамыған. Газ өңдеу зауытының өндірістік қуаты жылына 4,2 млрд текше метр газды құрайды. Кәсіпорынның жүктемесін арттыру мәселесі пысықталуда.

Олжас Бектенов мұнай-газ саласының өнеркәсіптік өсудің маңызды драйвері болып қала беретінін атап өтті. Қазақстанда жыл сайын 85 млн тоннадан астам мұнай және шамамен 55 млрд текше метр газ өндіріледі. Мұндай көлемді тұрақты ұстап тұру заманауи технологияларды енгізу мен ірі кен орындарын дамытудың арқасында мүмкін болып отыр. 

Үкімет өндірісті арттырудан бастап, қайта өңдеуді тереңдету және мұнай-газ химиясын кеңейтуге дейінгі батыл шешімдерімен жер қойнауын ұтымды пайдалану стратегиясын дәйекті түрде жүзеге асырып келеді. Сонымен қатар, отандық өндірушілерді қолдаудың маңыздылығы және отандық тауарларды сатып алу үлесін одан әрі арттыру қажеттігі де атап өтілді.

Бүгін, 14:41