БҚО да ірі мұнай газ кен орындары жаңғыртылуда

Батыс Қазақстан облысында Қарашығанақ пен Шыңар кен орындары жаңғыртылып жатыр. Қос кеніштен жыл сайын 12 миллион тоннадан астам мұнай және жеті жарым миллиард текше метр газ өндіріледі. Қазір өңірде шикізатты терең өңдеу мен өндіріс көлемін арттыру бағытында жаңа жобалар жүзеге асуда.

Мемлекет басшысының мұнай-газ саласын дамыту жөніндегі тапсырмасының орындалу барысымен Премьер-Министр Олжас Бектенов аймаққа жұмыс сапары барысында танысты. Сондай-ақ Үкімет басшысы бірнеше өндірістік кәсіпорындарды аралады.

Премьер-Министрдің сапары

Қарашығанақ – еліміздегі ең ірі кен орындарының бірі. Оның қорында 270 млн.тонна мұнай мен 800 млрд.текше метр газ бар. Қазір мұнда газ айдау тиімділін арттырып, өндіріс көлемін ұлғайту бойынша тың жобалалар жүзеге асырылып жатыр. Кен орнын Премьер-Министр Олжас Бектенов аралап көріп, мұнай-газ саласына жаңа технологияларды енгізу керектігін атап өтті. Үкімет басшысы одан бөлек, Бәйтерек ауданындағы газ өңдеу зауытында болды. Кәсіпорынның жылдық қуаты - 4 млрд.текше метр. 

Асхат Сейітқазин, кәсіпорынның бас директоры:

- Зауытта газконденсат қоспасы өңделіп, автокөлікке арналған пропан газы да шығарылады. Кәсіпорында мердігер ұйымдарды қосқанда 800 адам жұмыс істейді.

Киік етін өңдеу зауыты ашылады

Премьер-Министр Олжас Бектенов Оралдағы ет өңдеу зауытына да соқты. Бұл жерде ет және жартылай фабрикаттар өндіріледі. Оның бір бөлігі экспортқа шығарылады. Кәсіпорында 700 адам еңбек етеді. Серістестік Атырау, Ақтөбе және Батыс Қазақстан облыстарының мыңдаған шаруасымен әріптестік орнатқан.

Талғат Берекешев, зауыт жетекшісі:

- 2026 жылы киік етін өңдеуді бастаймыз. Қазір Президент тапсырмасы бойынша дайындық жұмыстары жүріп жатыр. Зауыт жылына 4 мың тоннадан аса ет консервісі мен екі мың тонна балық және 500 тонна сүт өнімдерін шығарады.

Өңірде машина жасау саласы да қарқынды дамып келеді. Мұнай-газ саласына қажет құбырлар шығару зауытында жылына 40 мың тонна өнім өндіріледі. Оның бір бөлігі ТМД елдеріне экспортталады. Цифрландыру бойынша әр тауарға QR код жазылады. 

Александр Безруков, кәсіпорынның атқарушы директоры

- Кәсіпорында Қазақстанда баламасы жоқ жоғары сапалы бұранда шығарылады. Ол газ ұңғымаларында кеңінен қолданылады.

Бұл жерде Үкімет басшысына ірі инвестициялық жобалары таныстырылды. Биыл облыс экономикасына шетелден 1 миллиард доллар қаржы тартылды. Ол жағынан өңір Астанамен Алматы қалаларынан кейінгі орында тұр. Болашақта 73 жоба іске қосылады.

Гэ Тзянь, инвестор:

- Компаниямыз Оралда энергостанция салуды жоспарлап отыр. Сонымен қатар 4 серіктес тартып, басқа да өндірістер ашылады. Жер аумағын алдық. Одан бөлек 134 млрд. теңгеге технопарк, 70 млн.долларға газ станциясы бой көтереді.

143 шақырым бөгет салынды

Олжас Бектенов Оралда көктемгі тасқыннан зардап шеккен тұрғындармен кездесті. Өңірде олар үшін 889 жаңа үй салынған. Тұрғын үй аумақтары инженерлік желілерге қосылып, толық абаттандырылған. Үкімет басшысы сонымен қатар облыс орталығындағы жаңартылған жағалауда болып, бөгеттерді нығайту жұмыстарымен танысты. Өңірде 143 шақырым бөгет пен 9 шақырым су бұру арнасы салынды.

Авторлары: Айдарбек Айтмұхамбетұлы, Альбина Кұмарғалиева, Болат Жарылғасов, Эльдар Аюпов