Бектенов: Пайдалы қазбаларды өндіру саласында инвесторларға жағдай жасау Үкіметтің басым міндеті

 — Саланың алдында тұрған басым бағыттардың бірі — сирек кездесетін металдар өндірісін дамыту. Еліміз жаһандық өндіріс тізбегінде маңызды рөл атқаратын аса қажетті минералдардың қомақты қорына ие.

Атап айтсақ, өткен жылы церий, неодим, иттрий және басқа да сирек металдардың 800 мың тоннаға жуық қоры бар «Құйрықтыкөл» ірі кен орны ашылды. Біздің геологиялық ресурстарымыз техногендік минералдық түзілімдердің есебінен де кеңейіп келеді. Оларды игеру өндіріс үшін жаңа мүмкіндіктер ашады, — деді Олжас Бектенов.

Премьер-министр су ресурстарын басқаруды да ерекше бағыттардың бірі ретінде атап өтті.

— Еліміздің жерасты суларының барлық кен орындарын түгендеу бойынша ауқымды жұмысты бастадық. Бұл орайда, табиғи байлықты қорғау, таза ауа мен су қорын сақтау, қолда бар ресурстарды ұқыпты пайдалану — бәріміздің қастерлі парызымыз. Бүгінгі және келешек ұрпақтың әл-ауқаты да тікелей осыған байланысты, — деді ол.

Үкімет басшысы бүгінгі Форум геология үшін ғана емес, экономиканың басқа салалары бойынша да бірлескен шешімдерді әзірлеп, серіктестік қатынастарды нығайту бағытында өзекті алаң екенін баса айтты.

— Қазақстан — минералдық шикізат ресурстарына бай ел. Пайдалы қазбаларды барлау, өндіру және оны өңдеу саласында инвесторлар үшін қолайлы жағдай жасау — Үкіметтің басым міндеті болып қала бермек, — деді Премьер-министр.

Айта кетейік, кеше форумның бірінші күнінде Энергетика вице-министрі Ерлан Ақбаров елімізде геологиялық барлауға салынған инвестиция көлемі 433 млрд теңгеге жеткенін атап өтті.