Бектенов тәртіптік жаза қолдануды тапсырған облыс әкімінің орынбасары сынға жауап берді

АСТАНА, 6 қазан – Sputnik. Абай облысы әкімінің орынбасары Бекжан Бапышев жылыту маусымын бастауға қатысты пікір білдірді, деп хабарлайды Sputnik Қазақстан тілшісі.

Үкіметтің бүгінгі отырысында премьер-министр Олжас Бектенов Абай облысы әкімінің орынбасарын тәртіптік жауапкершілікке тартуды тапсырды. Себебі жылу көздері мен желілері 1 қазанға дейін дайын болмай қалды.

Абай облысы әкімінің орынбасары Бекжан Бапышевтің айтуынша, бүгінде облыс жылыту маусымына толық дайын, жылу беру жұмыстары штаттық режимде жүргізіліп жатыр.

Атап айтқанда, 1 қазаннан бастап Семейдегі әлеуметтік нысандар кезең-кезеңімен жылу жүйесіне қосылды. Қазіргі кезде көпқабатты тұрғын үйлерге де жылу беріліп жатыр.

"Семей қаласы бойынша 2 жылдық өтпелі 5 жоба бар. 1 жоба бойынша мердігер ұйым тарапынан олқылықтар болды. Яғни, құрылғылар уақытында жеткізілмеді. Бүгінгі күні құрылғылар толығымен орнатылды. Біз жылыту маусымына толығымен кірдік. Бірінші кезекте әлеуметтік нысандар қосылды. Екінші кезекте тұрғын үйлер қосылып жатыр. Тұрғындардың алаңдауына еш негіз жоқ екенін жеткізгіміз келеді", - дейді Бапышев.

Ол өңірдегі жылумен қамту мәселесі тұрақты бақылауда ұстап отыр.