Бельгия астанасында Қазақстан мәдениеті апталығы өтіп жатыр

Өнерпаздар Брюссель көшелерінде флешмоб ұйымдастырып, еуропалықтарға дәстүрлі ән-күйден шашу шашты, би биледі. 

Атомиум — Брюссельдегі басты орындардың бірі. Тарихи ескерткіш осыдан 70 жылдай бұрын атом энергиясын бейбіт мақсатта қолданудың символы ретінде тұрғызылған. Осы жолы оның алды шағын қойылым алаңына айналды. Қазақстандық өнерпаздар флешмоб ұйымдастырып, шетелдіктерді қазақтың бай мәдениетімен таныстырды.

Марко Рансингер, словениялық турист:

- Ерекше әсер алдым! Әлем мәдениетімен танысу әрдайым қуаныш сыйлайды. Менің туристік тобыма да қойылым өте ұнады.

«Алатау әуендері» концерттік ұйымына қарасты «Құлансаз» фольклорлы-этнографиялық ансамблі Брюссельге Қазақстанның Белгиядағы елшілігінің шақыруымен және Алматы облысы әкімдігінің қолдауымен келген. Құрамында би ансамблі, сондай-ақ дәстүрлі, классикалық және эстрадалық жанрларда өнер көрсететін жеке дауыстағы әншілер де бар.

Әділет Жексенбі, ансамбль әншісі:

- Біздің өнерімізді, мәдениетімізді өте жоғары деңгейде қабылдауда. Ықыластары сондай керемет. Бізге рух берді.

Қазақ өнерін халықаралық деңгейде паш етіп жүрген ұжым үлкен сахнада да өнер көрсетті. Көрермендер қатарында жергілікті диаспора өкілдерімен бірге Еуропалық институттардың депутаттары да болды. Жиналғандардың делебесі қозып, әсем ән мен тәтті күйге елітіп, билеп отырды.

Фабиен Калэ, Брюссель қаласының тұрғыны:

- Өте тебірентерлік. Бұрын-соңды білмеген ұлттық музыкалық аспаптарын тыңдап, тілдің сұлулығын естіп, бишілердің қимыл-пластикасын көріп таң қалдым.

Ләззат Бейсенова, қазақ диаспорасының өкілі:

- Жерлестеріміз осындай тамаша концерт беруге келіп тұрсын. Біз елімізді сағынған кезде осындай концертті көріп, елімізде болғандай боламыз.

Бельгия –  саксофонның отаны. Сондықтан кеште жергілікті саксофоншы ансамбльмен бірге француз әуенін орындады. Тағы бір шетелдік қасиетті қара домбырамен күй тартты. Енді үйреніп жүргеніне қарамастан, «Ерке сылқымды» жаңылмай шертіп, өнерде шекара жоқ екенін тағы бір дәлелдеді. Отандық өнер ұжымы бельгиялық поп-жұлдыз Stromae-ның әнін француз тілінде айтып, халықтың қошеметіне бөленді. Димаш Құдайбергеннің жанкүйерлері де қалыс қалмады. Сүйікті әншісінің «Махаббат бер маған» әнін шырқап, көпшілікті сүйсінтті.

Еуропа төріндегі өнер кеші Қазақстан мен Еуропалық Одақ арасындағы кеңейтілген әріптестік және ынтымақтастық туралы келісімнің 10 жылдығына және ұлы композитор Нұрғиса Тілендиевтің 100 жылдық мерейтойына арналды. Мәдениет апталығы аясында Бельгия корольдігінің музыкалық аспаптар мұражайына домбыра мен сазсырнай тарту етілмек. 

Авторлары: Ғалымжан Қараманұлы, Жомарт Ахметов