Бензин сегіз теңгеге қымбаттады: Ұлттық банк бұл басқа бағаларға қалай әсер ететінін күтуде

Бензин мен дизель бағасының өсуі жүргізушілердің шығынына байланысты ғана емес, инфляция үшін де маңызды: жанармай тасымалдау құнына кіреді және басқа тауарлардың бағасына әсер етуі мүмкін. Бұл туралы Ұлттық банк төрағасының орынбасары Ақылжан Баймағамбетов ең ірі жанар-жағармай құю бекеттері желісінде баға көтерілгеннен кейін айтты, деп хабарлайды Tengri Auto.

Баймағамбетовтың сөзінше, қыркүйекте жанар-жағармай материалдары бағасының жылдық өсімі шамамен 10,4-10,5 пайыз болды. Қазанда бұл көрсеткіш шамамен 8,4-8,5 пайызға дейін төмендеді. Бұған былтыр қазандағы көрсеткіштің есептен шығарылуы себеп болды, ол кезде де жанармай айтарлықтай қымбаттаған болатын.

"Тұтыну қоржынындағы үлесіне байланысты тікелей қосылатын үлес соншалықты көп болмауы мүмкін, бұл жерде желілік әсер маңыздырақ", - деп түсіндірді Баймағамбетов.

Ол жанармайды "маркер-тауар" деп атады: автокөлік жүргізушілері жанармай бекеттеріндегі өзгерісті бірден байқайды. Сонымен қатар бензин мен дизель бизнес шығындарына, соның ішінде логистикаға әсер етеді. Сондықтан Ұлттық банк жанармайдың қымбаттауы басқа тауарлар мен қызметтердің құнына қалай әсер ететінін бақылап отырады.

"Бензин бағасының өсуіне базалық мөлшерлемемен тікелей жауап бермейміз. Бірақ жанама әсерін мұқият бақылаймы: бізге бұл өсім басқа бағаларға қалай әсер ететіні маңызды", - деді Ұлттық банк төрағасының орынбасары.

Баймағамбетов жанармай бағасының өсуін келесі жылға арналған болжамдағы проинфляциялық тәуекел деп атады. Оның айтуынша, бұл фактор реттеушінің болжамдары мен жұмысында ескеріледі. Бұл ретте Ұлттық банк инфляция белгіленген дәлізде қалады деп болжайды.

Ол Қазақстанда бензин өндіру тиімді әрі өндірушілерде қажетті шикізат болуы үшін саланы либерализациялау маңызды екенін айтты. Бұл ретте ол мүдделер теңгерімін ескеру қажеттігін атап өтті.

Сәуірде АИ-92 мен дизель отыны бағасын көтеруге қатысты мораторий аяқталғаннан кейін жанармай бекеттері бағаны өзгерте бастағанын жазған едік. Энергетика министрлігінің өкілдері ол кезде баға күрт өспейтінін айтып, бірақ біртіндеп қымбаттауы мүмкін екенін жоққа шығармады.

Сондай-ақ Tengri Auto мораторий жойылғаннан кейін Алматы мен облыстағы жанармай бекеттеріндегі бағаны салыстырып, қаншалықты өзгергенін анықтады.

Қазанда Ұлттық банк базалық мөлшерлемеге қатысты шешімін түсіндірді. Реттеуші инфляцияға әсер етуі мүмкін факторлар қатарында жанармай құнын, тарифтер мен мемлекеттік шығыстарды атап өтті.

Бізді Google-дың негізгі дереккөздер тізіміне қосыңыз