Бетпе бет : Шығыс Қазақстан тұрғындары аюлармен кездесулері туралы айтып берді

Шығыс Қазақстанда аюлар адамдарға жиі көріне бастады. Маусым басталғалы бері мамандарға елді мекендердің маңында жыртқыштардың пайда болғаны туралы 40-тан астам хабарлама түскен. Кей жерлерде тұрғындар қараңғы түскеннен кейін үйден шығуға қорқады, деп хабарлайды Tengri Life Almaty.tv арнасына сілтеме жасап.

Риддер маңындағы Шаравка ауылының тұрғындары үшін аю бұдан былай орманнан келетін сирек қонақ емес. Мұнда маймақтарды күн сайын кешке, тіпті кейбірін күндіз де көреді. Жыртқыштар екінші жыл қатарынан ауыл тұрғындарын үрейде ұстап отыр, бірақ биылғы жазда жағдай тіпті қиындап кетті. Осы елді мекеннің тұрғыны Наталья Копылова бірде жайылымда аюмен бетпе-бет келген.

"Бұл өте қорқынышты! Түсінсеңіздер, мен онымен бетпе-бет келдім! Мен күн сайын Шаравканың іргесіндегі шабындықтар мен егістіктерге мал іздеп шығамын. Қай бұтаның артында ол мені күтіп тұрғанын білмеймін", – дейді ол.

Аюлардың неліктен тұрғын үйлерге жақындай бастағанын жергілікті халық түсінген сияқты. Орманда аңдарға үйреншікті азық жетіспейді. Көктемгі үсік пен құрғақ жаз жидек, саңырауқұлақ пен жаңғақ өніміне теріс әсерін тигізді. Ал бақшаларда қазір қорек мол. Аюларды әсіресе алма қызықтырады. Ауыл тұрғындары олардың ізін өз аулаларынан жиі тауып жатыр, делінген материалда.

Бірақ бау-бақшаға шабуыл жасау – мәселенің бір бөлігі ғана. Орман және аңшылық шаруашылығының жедел әрекет ету жасағының мамандары адам өміріне де қауіп төнуі мүмкін екенін айтады. Елді мекендерге аюлардың келгені туралы хабарлама түскенде, оқиға орнына дәл осы мамандар шығады.

"Риддерде аюдың адамға шабуыл жасау оқиғасы тіркелді. Ара өсіру шаруашылығында (пасека) жұмыс істеп жатқан адамға кенеттен аю тап берген. Маңайда екі адамның болғаны жақсы болды, олар жыртқышты үркітіп, арашалап алды. Соған қарамастан, зардап шегуші көптеген жарақатпен және ашық сынықтармен ауруханаға түсті", – деді орман және аңшылық шаруашылығы жедел әрекет ету жасағы бастығының орынбасары Сергей Карманников.

Енді жедел топтың міндеті – шақырылмаған қонақтарды үркітіп, орманға қайта айдау. Оларды іздеу үшін бригадалар жылувизорлар мен дрондарды пайдаланады, деп түсіндіріледі сюжетте. Бір аптаның ішінде тек Риддер маңынан 10 жыртқыш анықталған. Ал жаз бойы өңірде аюлар 40-тан астам рет байқалды – Алтайда, Серебрянскіде, Ұлан және Марқакөл аудандарында, тіпті Өскеменнің өзінде. Аса қауіпті жағдайларда инспекторларға жануарларды атуға рұқсат берілген.

Google News арқылы жаңалықтарымызды қадағалаңыз