BETT Show 2026: Қазақстан білім беру мен жасанды интеллект саласындағы жаңа кезеңге қадам басты

ҚР Ғылым және жоғары білім министрі Саясат Нұрбек білім беру технологиялары саласындағы әлемдегі жетекші халықаралық алаңдардың бірі – British Education Training and Technology Show (BETT Show 2026) көрмесіне қатысып, Қазақстан үшін маңызды қорытындылар жасалды, – деп хабарлайды Aikyn.kz сайты. 

Аталған көрме білім беру жүйесінің дамуы, цифрлық трансформация және оқыту процесіндегі жасанды интеллектінің рөлі мәселелеріне арналды.

Қазақстанның ұлттық павильоны көрмеде екінші рет ұсынылып, отандық білім беру жүйесі мен инновациялық дамудың негізгі жетістіктерін таныстырды. Экспозиция аясында 9 қазақстандық жоғары оқу орны мен ұйымдары өздерінің білім беру бағдарламаларын, ғылыми әзірлемелерін және цифрландыру, жасанды интеллект пен білім беру технологиялары саласындағы заманауи технологиялық шешімдерін ұсынды.

Көрмеге қатысу ҚР Ғылым және жоғары білім министрлігінің қолдауымен ұйымдастырылып, жоғары технологиялар саласындағы мемлекеттік саясаттың іске асырылуын, сондай-ақ Мемлекет басшысының 2026 жылды «Цифрландыру және жасанды интеллект жылы» деп жариялау жөніндегі стратегиялық бағытын жүзеге асыруды көрсетеді.

Көрме аясында Lenovo, Intel, Microsoft және Google сынды жетекші халықаралық технологиялық компаниялардың өкілдерімен жұмыс кездесулері өтті. Келіссөздер барысында заманауи цифрлық шешімдерді, жасанды интеллект технологияларын және инновациялық білім беру платформаларын Қазақстанның жоғары және жоғары оқу орнынан кейінгі білім беру жүйесіне енгізу перспективалары талқыланды. Сонымен қатар білім беру инфрақұрылымын жаңғырту және қазақстандық университеттердің қатысуымен бірлескен жобаларды іске қосу мәселелеріне ерекше назар аударылды.

Сапардың маңызды стратегиялық нәтижелерінің бірі – Қазақстанның OpenAI Edu for Countries бастамасының алғашқы халықаралық легіне қосылуы болды. Қазақстан бұл бағдарламаға Эстония, Сингапур, БАӘ, Иордания және Грекиямен қатар еніп, жасанды интеллектіні білім беру жүйесіне жүйелі түрде енгізуге көшкен Орталық Азиядағы алғашқы мемлекет атанды.

Сондай-ақ университетаралық әріптестікті дамытуға көңіл бөлінді. Министр бастаған делегация Coventry University барып, онда білім берудің нақты экономика және индустриямен тығыз ықпалдастырылған моделін көрді. Инженерлік мектептер, заманауи зертханалар, 3D-иммерсивті оқыту форматтары мен практикалық бағыттағы тәсіл студенттің оқу процесінің өзінде-ақ болашақ кәсіби ортаны және қолданылатын технологиялық үдерістерді нақты түсінуіне мүмкіндік береді.

Ұлыбританияда сондай-ақ жетекші университеттерде, оның ішінде University College London оқу орнында білім алып жатқан қазақстандық студенттермен кездесулер өтті. Кездесу барысында министр «Kazakhstan: the Territory of Academic Knowledge» тақырыбында дәріс оқып, Қазақстандағы жоғары білім мен ғылымды дамытудың стратегиялық көзқарасын, халықаралық академиялық ынтымақтастықтың басым бағыттарын, сондай-ақ цифрландыру мен жасанды интеллектіні білім беру процесіне енгізу жөніндегі негізгі бастамаларды таныстырды.

Сапардың маңызды бағыттарының бірі ғылыми-инновациялық ынтымақтастықты дамыту болды. Қазақстан делегациясы AstraZeneca компаниясының Discovery Centre орталығына барды. Бұл – әлемдегі ең ірі ғылыми-зерттеу және инновациялық орталықтардың бірі. Кездесу қорытындысы бойынша ғылым, зерттеулер және инновациялар саласындағы практикалық ынтымақтастықты дамытуға жаңа мүмкіндіктер ашатын өзара түсіністік туралы меморандумға қол қойылды. Құжат аясында нақты клиникалық тәжірибе деректерін пайдалану, ерте диагностика бағдарламаларын дамыту, жастар арасында жұқпалы емес аурулардың алдын алу бастамаларын кеңейту, сондай-ақ тұрақты даму және жасыл технологиялар саласындағы жобаларды іске асыру көзделген.

Сонымен қатар сапар барысында Queen’s University Belfast және Heriot-Watt University өкілдерімен жұмыс кездесулері өтті. Онда академиялық ынтымақтастықты кеңейту, бірлескен білім беру бағдарламаларын іске асыру, ғылыми зерттеулерді дамыту және университетаралық серіктестіктің жаңа форматтарын қалыптастыру перспективалары талқыланды.

Жалпы алғанда BETT Show 2026 көрмесіне қатысу және оның аясында өткен кездесулер Қазақстанның цифрлық технологиялар мен жасанды интеллектіні енгізуге, сондай-ақ халықаралық академиялық және ғылыми-инновациялық ынтымақтастықты кеңейтуге негізделген бәсекеге қабілетті жоғары білім және ғылым жүйесін қалыптастыруға бағытталған стратегиялық курсты жүйелі түрде жүзеге асырып отырғанын көрсетті. Қол жеткізілген келісімдер мен нәтижелер практикалық бағыттағы жобаларды іске асыруға және қазақстандық университеттердің жаһандық білім беру мен ғылыми-зерттеу кеңістігіне одан әрі ықпалдасуына берік негіз қалайды.