Бір пышақпен бүкіл отбасы дерлік өлтірілді. Атыраудағы трагедияның жаңа мәліметтері

18 мамырда Атырау сотында Жангелдин ауылындағы бір отбасын өлтіру ісі бойынша тың деректер жарияланды. Оқиға салдарынан ерлі-зайыпты мен олардың екі ересек баласы қаза тапқан. Алдын ала тыңдау барысында мемлекеттік айыптаушы қылмыстың мән-жайын оқып берді, сотқа Tengrinews.kz тілшілері қатысты.

18 мамырда Атырау сотында Жангелдин ауылындағы бір отбасын өлтіру ісі бойынша тың деректер жарияланды. Оқиға салдарынан ерлі-зайыпты мен олардың екі ересек баласы қаза тапқан. Алдын ала тыңдау барысында мемлекеттік айыптаушы қылмыстың мән-жайын оқып берді, сотқа Tengrinews.kz тілшілері қатысты.

Айыптау нұсқасы бойынша, сотталушы Сұлтан Сәрсемалиев (отбасының бұрынғы күйеу баласы - ред. еск.) барлық эпизодта бір ғана ас үй пышағын қолданған. Іс материалдарына сәйкес, ол бұл пышақты өзімен бірге алып жүріп, отбасының бірнеше мүшесіне шабуыл жасау кезінде пайдаланған.

Атап айтқанда, сотта сотталушы Сұлтан Сәрсемалиевтің бұрынғы әйелінің әпкесі Мейрамгүл Қарабалинаны өлтіруіне қатысты егжей-тегжейлі мәліметтер айтылды. Сотта атап өтілгендей, ол әпкесіне қонаққа келіп, оның тұрмыс жағдайына - үйінде азық-түліктің жоқтығына және баспананың нашар күйіне көңілі толмайтынын білдірген. Тергеу болжамы бойынша, бұл сөздер Сәрсемалиевтің ашуын туғызған.

"Осы сәтте Мейрамгүл Қарабалинаның тұрмыстық және материалдық жағдайға қатысты айтқан сөздері Сұлтан Сәрсемалиевтің ашу-ызасын тудырған", - делінген айыптау актісінде.

Өзінің қылмыстық ниетін іске асыру мақсатында ол ас үйдегі тоңазытқыштың үстінде тұрған пышақты алған. Айыптау деректеріне қарағанда, бұл пышақ бұған дейінгі кісі өлтіру оқиғаларында да қолданылып, ол пышақты Қызылқоға ауданынан ала келген. Сәрсемалиев бұрынғы әйелінің әпкесінің кеуде, арқа және іш тұсына бірнеше рет пышақ сұққан.

"Мейрамгүл Қарабалина алған жарақаттарынан еденге құлаған кезде, оның тұрмыс жағдайы туралы айтқан сөздеріне байланысты сотталушыда оны ерекше қатігездікпен өлтіру ниеті туындаған", - делінген айыптау актісінде.

Соның салдарынан ол жәбірленуші еденде жатқанда оның кеуде, іш, қол және бет тұсына тағы да көптеген соққы жасаған.

Іс материалдарынан белгілі болғандай, Сәрсемалиев Мейрамгүл Қарабалинаның өлгеніне көз жеткізген соң, оның денесін кілемге орап, үйдің кіреберісіне шығарған.

ҚАЗІР ТАЛҚЫЛАНЫП ЖАТЫР

Салтанат Нүкенованың ағасы Бишімбаевтың қарындасымен “хайп“ жасады деген айыптауларға қатысты соттасты

12 мамыр 13:53 1

Қызылордада тұрғын үй-коммуналдық шаруашылық саласын дамыту тақырыбында форум өтті

12 мамыр 22:48 2

Қазақстанның Ибраһим келісімдеріне ресми түрде қосылу рәсімі Астанада өтуі мүмкін

27 сәуір 20:44 1

Тергеу нұсқасына сәйкес, қылмыс ізін жасыру үшін ол мәйітті бұған дейін ағасы Наурыз Мұқанғалиевтің денесі жасырылған шұңқырға көмуді ұйғарған.

"Ол үшін сол күні сағат 21:00 шамасында аулаға шығып, бұрын көмілген шұңқырдың бір бөлігін шамамен 30 сантиметр тереңдікте қазып, кілемге оралған мәйітті сонда апарып тастаған. Содан кейін мәйіттерді жасырып, шұңқырды толық көміп тастаған", - деп қорытындылады прокурор.

Бұған дейін сотта Атыраудағы бір отбасын өлтіру мотиві айтылған еді.

Айта кетейік, 18 мамырдағы отырыс барысында прокурор Мирас Бауыржанов айыптау актісін оқыды, онда сотталушының бұрынғы жұбайының туған ағасы Наурыз Мұқанғалиевтің және отағасы Мақсот Қарабалиннің өліміне әкеп соққан жанжалдың мән-жайы егжей-тегжейлі баяндалған.

Осы деректер жария етілген кезде Tengrinews.kz тілшілері сотталушы Сәрсемалиевтің прокурор айыптауларына реакциясын түсіріп алды. Ол прокурорды ешқандай қобалжусыз тыңдап отырды, тіпті бір сәтте оның жүзінен күлімсіреуге ұқсас белгі байқалды.

Айта кетейік, алдын ала сот отырысы - бұл тараптар іс материалдарымен танысатын, процессуалдық мәселелерді талқылайтын және сотта істі одан әрі қарау тәртібі айқындалатын кезең. Басты сот талқылауы 28 мамырға белгіленді.

Атышулы істі бұған дейін Яна Легкодимованың өліміне қатысты резонансты іс бойынша үкім шығарған судья Зарема Хамидуллина қарайды.

Сот залынан фото Tengrinews.kz: Әлімжан Аманжол

Бұл кадрларды Tengrinews.kz журналистері сот отырысы басталғанға дейін түсіріп алған.

Адам өлтіру, ұрлық және алаяқтық: күдіктіге қандай айып тағылып отыр?

Сұлтан Сәрсемалиевке Қылмыстық кодекстің бірден үш бабы бойынша айып тағылған:

99-баптың 2-бөлігі 1 және 13-тармақтары "Екі немесе одан да көп адамды өлтіру";
188-баптың 2-бөлігі "Адамдар тобының алдын ала сөз байласуымен жасалған ұрлық";
190-бап "Алаяқтық".

Прокуратура мәліметінше, ұрлық пен алаяқтық эпизодтары қаза тапқандардың жеке заттарын жымқыру және олардың малын заңсыз сату фактілерімен байланысты.

Бұған дейін Атырау облысының прокуратурасы психологиялық-психиатриялық сараптама қорытындысы бойынша Сұлтан Сәрсемалиевтің есі дұрыс деп танылғанын хабарлаған болатын. Бұл оның заңда қарастырылған көлемде толық жауап беретінін білдіреді.

Тағылған айыптарды ескере отырып, оған өмір бойына бас бостандығынан айыру жазасы тағайындалуы мүмкін.

10 мамырда БАҚ беттерінде Сұлтан Сәрсемалиевтің кінәсін мойындағаны және қазіргі уақытта тергеу изоляторында сотты күтіп отырғаны хабарланды. Дереккөздердің мәліметінше, айыпталушы қылмыстық іс материалдарымен танысып, кінәсін мойындау туралы жауап берген.

Күдіктінің жұбайына неге айып тағылмады?

10 наурызда тергеу соты қаза тапқандардың қызы және Сұлтан Сәрсемалиевтің жұбайы Ақбаян Мұқанғалиеваны Атыраудағы арнайы мекемеге сот-психологиялық-психиатриялық сараптамадан өтуге жіберді.

Наурызда прокуратура өкілдері әйелден психикалық бұзылу белгілері анықталса, оған Алматыда сараптама тағайындалатынын хабарлады.

10 сәуірде Мұқанғалиева Алматыдағы Сот сараптамасы институтына ауыстырылды.

Ақбаян Мұқанғалиева / ІІМ видеосынан кадр

4 мамырдағы жағдай бойынша Мұқанғалиеваға қатысты сот-психологиялық-психиатриялық сараптаманың қорытындысы әлі алынған жоқ. Прокуратура оның іс-әрекеті әлі сараланбағанын және оған қатысты бұлтартпау шарасы таңдалмағанын хабарлады.

"Мұқанғалиеваның іс-әрекеттері сараланған жоқ, оған қатысты бұлтартпау шарасы таңдалмады. Қылмыстық құқық бұзушылықтарды күдікті Сәрсемалиев жеке өзі жасаған. Басқа тұлғалардың қатысы бар екендігі туралы деректер анықталған жоқ. Сот-психологиялық-психиатриялық сараптаманың қорытындысына сәйкес, Сәрсемалиев өз іс-әрекетінің нақты сипаты мен қоғамдық қауіптілігін сезінуге, сондай-ақ оған ие болуға қабілетті деп танылды", – деп хабарлады прокуратура.

Бір отбасының өліміне қатысты іс

2025 жылдың желтоқсанында туыстары зейнеткер ерлі-зайыпты мен олардың ересек балаларының жоғалғаны туралы хабарлаған еді.

Сол кездегі мәлімет бойынша, отбасы үйден белгісіз бағытқа шығып кетіп, содан бері олардың қайда екені белгісіз болып келген.

Фото: полицияның баспасөз қызметі

Іздеуде төрт ересек адам болды:

66 жастағы Мақсот Қарабалин; 64 жастағы Нәсіп Өтешқалиева; 35 жастағы қызы Мейрамгүл Қарабалина; 32 жастағы ұлы Наурыз Мұқанғалиев. Ерлі-зайыптының денесі қай жерден табылды?

6 қаңтарда Жангелдин ауылында зейнеткер ерлі-зайыптының денелері табылды. Кейін құқық қорғау органдары мәйіттердің үй ауласындағы шаруашылық құрылыс астынан табылғанын хабарлады.

Ерлі-зайыптыны жерлегеннен кейін, 8 қаңтарда полиция іс бойынша негізгі күдіктіні жариялады. Ол отбасының 29 жастағы күйеу баласы – Сұлтан Сәрсемалиев болып шықты. Ол отбасының кенже қызы Ақбаян Мұқанғалиевамен бірге елден кетіп қалғаны белгілі болды.

Ер адамға халықаралық іздеу жарияланды.

Күдіктілер Индонезияда ұсталды

24 ақпанда Сәрсемалиев пен Мұқанғалиева Индонезияның Сенару ауылындағы қонақ үйлердің бірінде ұсталды.

Келесі күні, 25 ақпанда Ішкі істер министрінің орынбасары Санжар Әділов Ақбаян Мұқанғалиеваның да іс бойынша күдікті деп танылғанын хабарлады.

Ағалы-қарындасты жерлеу рәсімі

9 наурызда күдікті ерлі-зайыпты Алматыға экстрадицияланғаны белгілі болды. Онда Сәрсемалиев Наурыз Мұқанғалиев пен Мирамгүл Қарабалинаны өлтіргенін мойындап, олардың көмілген жерін көрсетті.

Ағалы-қарындастың денелері Атырау іргесіндегі Геолог шағынауданынан табылды. Олар негізгі күдікті бұрын жалдап тұрған үй ауласына көмілген.

11 наурызда Қызылқоға ауданы Жангелдин ауылында ағалы-қарындасты жерлеу рәсімі өтті.

Фотоны дереккөз арнайы Tengrinews.kz үшін ұсынды

Бұған дейін туыстары Tengrinews.kz тілшісіне пікір білдіруге дайын емес екендіктерін айтып, бұл барлық жақындары үшін үлкен қайғы екенін атап өтті.

"Ағайынды екеуі қарапайым әрі мейірімді жандар еді, қолдарында барымен бөлісуге әрқашан дайын тұратын. Ешкімге зияны тиген емес. Олар ата-анасының қасына жерленді", – деді туыстарының бірі.

Сәуірдің соңында облыс прокурорының көмекшісі Жандар Болатбек қылмыстардың жарты жыл бойы жасалғанын хабарлады: отбасының ұлы Наурызды күдікті 2025 жылдың мамырында өлтіріп, отбасының қалған мүшелерін қарашада мерт қылғанын хабарлаған болатын.

Сарапшылар әрбір қаза тапқан адамның денесінен алтыдан астам пышақ жарақатын анықтады. Соққылар ас үй пышағымен мойын және кеуде тұсына жасалған.