Отбасы банк: Бір жылда миллион жаңа салым

Биыл Отбасы банкі абсолютті рекорд орнатты. 12 айдың ішінде қазақстандықтар 1 млн жаңа депозит ашты.

Бұл - тұрғын үй құрылыс жинақ жүйесі тарихындағы ең жоғары көрсеткіш. Әсіресе «Наурыз» бағдарламасына деген қызығушылықты артты. Соның арқасында мыңдаған отбасы баспаналы болды.

Биыл 5 мыңнан астам отбасы «Наурыз» бағдарламасы арқылы баспана алды. Екі жылдың ішінде жоба 15 мыңнан астам қазақстандыққа пәтер алуға мүмкіндік берді. Сондай-ақ «Жұмысшы мамандықтар жылы» аясында іске қосылған «Наурыз Жұмыскер» арнайы бағдарламасымен 2,5 мыңнан астам адам қоныс тойын тойлады.

Ләззат Ибрагимова, «Отбасы банк» АҚ Басқарма төрағасы:

- Жұмыс орнынан анықтама әкелсе жеткілікті болды. Біз олардың кеңсе қызметкерлері емес, дәл инженерлік-техникалық мамандық иелері болуын мұқият тексердік. Әлеуметтік желілерде салымшылар «жаңа бағдарламалар шығармай, қолданыстағы бағдарламаларға үйренуге мүмкіндік беріңіздер» деп көп жазады. Мысалы, «Наурыз» бағдарламасының 4-ші кезеңі болады. Бұл бағдарлама 8 жыл бойы жалғасады, сондықтан адамдар барлық шарттарды біле отырып, алдын ала дайындала алады. Сондай-ақ, біз кезекте тұрған азаматтарға несиелік және жалдамалы тұрғын үйлерді сатуды, бөлуді жалғастырамыз.

Отбасы банкі ресми түрде Ұлттық даму институты мәртебесін алды. Енді бұл тұрғын үй саясатының негізгі құралы. Биыл қаржы ұйымы жалпы сомасы 1,5 трлн теңгеге барлық ипотекалық қарыздардың 57%-ын берді.

Ләззат Ибрагимова, «Отбасы банк» АҚ Басқарма төрағасы:

- Біз қазір кезекте тұрғандарға қатысты барлық тексерулерді цифрлық форматқа көшіріп жатырмыз. Осы инвентаризация барысында көптеген адамдардың критерийлерге сәйкес келмейтінін көріп отырмыз. Мысалы, олар мемлекеттік қызметші емес немесе жұбайының меншігінде баспана бар болып шығады. Осылайша, кезекті тазарту біртіндеп және ашық түрде жүріп жатыр.

Бүгінде 3,5 млн-ға жуық қазақстандық Отбасы банк арқылы үй алу үшін салым жасаған. Бір жылда бір миллион жаңа шот ашылды, бұл рекордтық көрсеткіш. Биыл 73 мыңнан астам азамат қоныс тойын тойлады.

Авторлары: Наргиз Бекмағанбетова, Арман Ақшабаев