Бір жарым жыл қудалаған: СҚО да сталкинг дерегі бойынша алғашқы үкім шықты

АСТАНА, 30 қаңтар-Sputnik. Солтүстік Қазақстан облысында "сталкинг" бойынша алғашқы үкім шықты.

Петропавл қаласының тұрғынын бір жарым жылдан астам уақыт бойы 37 жастағы ер адам қудалаған. Жәбірленуші полицияға танысының үнемі бақылау жасап, көңіл бөлуін талап етіп, тіпті араласатын ортасына дейін жанжал шығаратынын хабарлаған.
Бұған дейін ер адам жәбірленушінің атына балағат сөздер айтып, дене жарақатын келтіргені, сондай-ақ оның танысына шабуыл жасағаны үшін әкімшілік және қылмыстық жауапкершілікке тартылған.

Алайда, соған қарамастан, қудалауын тоқтатпаған.

"Жәбірленуші тыныштығынан айырылып, қала ішінде еркін қозғалу мен адамдармен қарым-қатынас жасаудан қорқып қалған. Ол танысының әрекетінен өзімен араласатын өзге азаматтар да жапа шегуі мүмкін деп қауіптенген", -деп жазды полиция.

2025 жылдың қыркүйегінен бастап Қазақстанда ҚК-нің 115-1-бабы "Сталкинг" күшіне енгеннен кейін, айыпталушы жәбірленушімен екі рет байланыс орнатуға әрекеттенген. Сол әрекеттердің бірі жәбірленуші подъезіне орнатқан бейнебақылау камерасына түсіп қалған.

Жәбірленуші 22 қаңтар күні полицияға жүгінген. Құқық қорғау органдары қысқа мерзімде тергеу жүргізіп, материалдарды сотқа жолдады.

"28 қаңтарда айыпталушыға қатысты үкім шығарылды. Ол 100 сағат қоғамдық жұмысқа тартылады. Сонымен қатар, оған алкогольдік ішімдік ішуге тыйым салынып, профилактикалық әңгімелесу үшін полицияға тұрақты түрде келу міндеттелді. Ең бастысы — жәбірленушімен кез келген байланысқа түсуіне қатаң тыйым салынды", - дейді облыстық полиция департаменті.

Айта кетері, қаңтар айында облыста сталкингтің екі фактісі тіркелген, екіншісі бойынша қазіргі уақытта сотқа дейінгі тергеу жүргізіліп жатыр.