Бишімбаевтың анасы антикор тексерісінен қорқып, 1 млн долларын туысына берген

Астанада бұрынғы Ұлттық экономика министрі Қуандық Бишімбаевтың туыстары арасындағы сот дауы жалғасып жатыр. Бұл істе Бишімбаевтың анасы Альмира Нұрлыбекова өз туысы Бекзат Кемелованы ірі көлемде алаяқтық жасады деп айыптауда, деп хабарлайды newsroom.kz.

Нұрлыбекованың айтуынша, Кемелова оған сенім ұялатып, 990 мың АҚШ долларын «сақтап берем» деп алып, кейін қайтармаған.

«Бекзатты 15 жылдан бері білемін. Ол – күйеуімнің немере ағасының келіні. Бір күні ол маған “Антикор үйіңді тінтеді, сенің барлық туыстарыңның аты тергеуде тұр, тек біздікілерде ғана жоқ” деді. Сөйтіп қорқытып, ақшаны өзіне беруге көндірдім», – деді Нұрлыбекова сотта.

Алайда уақыт өте келе Кемелова қаражатты қайтармаған. Нұрлыбекованың сөзінше, ол «ақшаны біреу Америкаға алып кетті» деп уәде берумен шектелген.

«Бір күні Бекзат өзі хабарласып, жылады. “Сен күйеуіңе айтып қойдың ғой, ол мені ұрып-соқты. Мен саған жақсылық жасағым келген еді” деді», – деп еске алды Бишімбаевтың анасы.

Ал айыпталушы Бекзат Кемелова өз кінәсін мойындамай, Бишімбаевтар әулетінің талабын «негізсіз және жала» деп атады.

Оның адвокаттары да өз нұсқасын келтіріп, бұл істі «Бишімбаевтар тарапынан кек алу әрекеті» деп бағалады. Айтуларынша, Кемелованың күйеуі — бұрынғы сот-медицина сарапшысы — марқұм Салтанат Нүкенованың өліміне қатысты сараптаманы бұрмалаудан бас тартқан.

Сот отырысы кезінде судья Бишімбаевтың анасынан:
— «Сіз ұлыңызды есі дұрыс емес деп тануға тырыстыңыз ба?» — деп сұрады.

«Жоқ. Мен өзімнің ақылды, білімді ұлымды “есі дұрыс емес” деп тануға ешқашан бармаймын», – деді Альмира Нұрлыбекова көзіне жас алып.

Ол келіні Салтанат Нүкенованың қазасын еске алып, бұл оқиға отбасы үшін ауыр соққы болғанын айтты.

Бүгін, 16:49