Биыл Халықаралық Еріктілер жылы

2026 жыл – Халықаралық Еріктілер жылы. Аталған бастама Қасым-Жомарт Тоқаевтың ұсынысы негізінде жүзеге асырылуда. 

Мемлекет басшысы бұл ұсынысты 2020 жылы БҰҰ Бас Ассамблеясының 75-сессиясындағы жалпы саяси пікірталас барысында ресми түрде жариялаған болатын. «Биыл Халықаралық еріктілер жылы аясындағы іс-шаралар еліміздегі волонтерлер қозғалысына тың серпін береді», - дейді жауаптылар.

Әлемде елдік істі ақысыз атқаруға дайын жандар бар. Биылғы жылды БҰҰ Халықаралық еріктілер жылы деп жариялады. Бұл бастаманы Мемлекет басшысы Қасым-Жомарт Тоқаев ұсынды. Қарарға Армения, Боливия, Германия және Кения қолдау білдіріп, құжатты қабылдауға ұйымға мүше 54 мемлекет қатысты. Онда еріктілердің қоғамдағы рөлі мен олардың тұрақты даму мақсаттарына жетудегі ықпалы кеңінен талқыланды.

Қасым-Жомарт Тоқаев, ҚР Президенті:

- Осындай құрметті жиында Халықаралық еріктілер жылының басталуына орай сөз сөйлеу мен үшін үлкен мәртебе. Бұл маңызды қадам біздің ортақ мақсатымызды, яғни еріктілікті дамыту мен оның ұлттық және жаһандық прогреске қосқан үлесін нығайтуды көрсетеді. Қазақстан осы бастаманы ұсынды және осы айтулы жыл бойы, одан кейінгі кезеңде де әлеуметтік маңызы бар еріктілік қызметті қолдау мақсатында Біріккен Ұлттар Ұйымына мүше барлық мемлекеттермен және азаматтық қоғаммен ынтымақтастықты жалғастырады. Біз ерікті болудың тұрақты даму мақсаттарына жетуге үлкен ықпал етіп отырғанына сенімдіміз.

Волонтерлердің күші мен ықпалы әрбір өңірде, әрбір қоғамда ерекше көрініс табады. Еріктілердің көмегімен жоғын түгендеп, барын бүтіндеп, қолдау көріп отырған отбасы көп. Олар әлемнің түкпір-түкпіріндегі апат аймақтарына ас-су жеткізіп, атылған оқ пен жарылыстарға қарамай медициналық көмек көрсетеді, психологиялық қолдау танытады. 

Зарина Мирабдуллаева, халықаралық волонтер:

- Қоғамға пайдасын тигізуді көздейтін еріктілердің қатары елде де жыл санап артып келеді. 2024 жылы 200 мыңнан аса волонтер болса, қазір олардың саны 400 мыңға жуықтап қалған. Ұлттық волонтерлер желісі өкілдерінің айтуынша, белсенділер түрлі бағытта жұмыс істейді.

Халықаралық еріктілер жылы аясындағы іс-шаралар еліміздегі волонтерлер қозғалысына тың серпін беріп, бұл бастаманың ұлттық, өңірлік және жаһандық деңгейде дамуына мүмкіндік тудырады. Сондай-ақ халықаралық ынтымақтастықты нығайтып, волонтерліктің болашағына бағытталған басты даму басымдықтарын айқындауға жол ашады. Жауаптылар осылай дейді.

Авторы: Әлішер Әли