Блогер Гусейн Гасанов төрт жылға сотталды

Мәскеудің Преснен соты блогер Гусейн Гасановты қылмыстық жолмен алынған ақшаны заңдастыру бойынша сырттай кінәлі деп таныды. Бұл туралы Мәскеу прокуратурасы және соттың баспасөз қызметі мәлім етті, деп хабарлайды Tengri Life.

Сот қандай жаза тағайындады?

Сот Гасановты төрт жылға бас бостандығынан айырып, жалпы режимдегі колонияда жазасын өтеуге үкім шығарды. Сонымен қатар блогер бір миллион рубль (шамамен 5,8 миллион теңге) көлемінде айыппұл төлеуі тиіс.

Сондай-ақ сот оған екі жыл бойы электрондық және ақпараттық-телекоммуникациялық желілердегі сайттарды әкімшілендіруге байланысты қызметпен айналысуға тыйым салды.

Іс қаралған кезде Гасанов іздеуде болғандықтан, процесс оның қатысуынсыз өтті. Оған қатысты сырттай қамауға алу түріндегі бұлтартпау шарасы таңдалды.

Прокуратура мәліметінше, Гасанов 2019-2021 жылдар аралығында жеке кәсіпкер ретінде жалпы сомасы 170 миллион рубльден аса (шамамен 1 миллиард теңге) салық төлеуден жалтарған.

Тергеу мен сот ол кейіннен бұл қаражаттың бір бөлігін заңдастырған деген қорытындыға келді. Прокуратура деректері бойынша, қаржылық операциялар мен жылжымайтын мүлік мәмілелері арқылы 68 миллион рубльден аса сома (шамамен 395 миллион теңге) заңдастырылған.

Атап айтқанда, сөз Мәскеудің 1-ші Красногвардейский өтпежолындағы тұрғын емес жайды сатып алу туралы болып отыр.

Сондай-ақ сот заңсыз жолмен алынған мүлікті мемлекет пайдасына өткізу туралы шешім шығарды.

Instagram-дағы бұл жарияланымды көру

ГУСЕЙН ГАСАНОВТЫҢ (@gusein.gasanov) жарияланымы

Гусейн Гасанов - ресейлік танымал блогер, кәсіпкер және инфлюенсер, ол әлеуметтік желілердегі ойын-сауық видеоларымен танымал болды. Ол қысқа роликтері, ұтыс ойындары және сәнді өмір салты туралы контенті арқылы танымалдылыққа ие болды. Оның Instagram-дағы парақшасына 30 миллионнан аса қолданушы жазылған.

Google News арқылы жаңалықтарымызды қадағалаңыз