Бөкейхан ауылының әкімі Жүсіп Төреғалиев аудит пен айыппұлдардан кейін қызметінен босатылды

12 желтоқсандағы өкімге Атырау облысының әкімі Серік Шәпкеновтің аудан тұрғындарымен кездесуінен кейін қол қойылды.

Бұған дейін редакция Бөкейхан ауылдық округі әкімдігінде және Фариза Оңғарсынова атындағы ауыл мектебінде жүргізілген ішкі аудит нәтижелері туралы хабарлаған болатын. Тексеру барысында қаржылық заң бұзушылықтар анықталды. Олардың ішінде жүргізуші куәлігінен айырылған қызметкерге заңсыз жалақы төлеу, қызметтік үйді құқығы жоқ адамдарға беру, мемлекеттік сатып алу және құрылыс жұмыстары саласындағы заң бұзушылықтар бар. Ресми жауапқа сәйкес, бюджетке келтірілген шығын толық өтелген.

Сонымен қатар, тракторға қосалқы бөлшектерді сатып алу және есептен шығару кезінде заң бұзушылықтар тіркелді. Тексеру деректеріне қарағанда, трактор әкімнің жеке шаруашылығында пайдаланылған. Төреғалиевтің үйінің жанында орнатылған құны 16 миллион теңгеден асатын трансформатор да аудиторлардың назарын аударған. Мемлекеттік аудит ауыл белсендісі Ақылбек Сәрсембаевтың арызы негізінде жүргізілді.

Құрылыс саласында да заң бұзушылықтар анықталды. Атырау облысының мемлекеттік сәулет-құрылыс бақылау басқармасының басшысы Нариман Биғали тексеру барысында Қазақстан Республикасының «Сәулет, қала құрылысы және құрылыс қызметі туралы» заң талаптарының сақталмағанын растады. Әкімге қатысты әкімшілік хаттамалар толтырылып, айыппұлдар салынды.

Ауыл кіреберісіндегі арка мен қорым қоршауын рұқсатсыз салғаны үшін барлығы үш әкімшілік хаттама рәсімделді . Екі айыппұлдың көлемі 314 мың теңгеден, үшіншісі сот шешімімен белгіленді.

Бөкейхан ауылына кіреберістегі арка «Өңірлерді дамыту» бағдарламасы аясында орнатылды. Оның құны 14,5 миллион теңгені құрады. Жұмысты «Dauyl Production» жеке кәсіпкерлігі атқарды, ал постаменттің дизайнын атыраулық суретшілер Талғат пен Аян Сатмағанбетовтер әзірлеген. Арканың биіктігі 5 метр 50 сантиметр, құрылым 12 күнде құрастырылған.

Кейін Атырауда өткен Әдеп кеңесінде бірнеше тәртіптік іс қаралып, Бөкейхан ауылдық округінің әкімі Жүсіп Төреғалиевті қызметінен босату ұсынылды. Бұған дейін, сәуір айында оған «қызметке толық сәйкес еместігі туралы ескерту» берілген болатын.

Атырау облысы әкімдігінің баспасөз қызметі ауыл тұрғындарының арыздары негізінде облыс әкімдігі аппаратының ішкі аудит қызметі ауылдық округ әкімінің аппаратына бөлінген бюджет қаражатының пайдаланылуына мемлекеттік аудит пен қаржылық бақылау жүргізгенін редакцияға хабарлады. 

Нәтижесінде, ҚР Мемлекеттік қызмет істері агенттігінің Атырау облысы бойынша Әдеп жөніндегі кеңесінің 2 қыркүйектегі шешімі негізінде Құрманғазы ауданы әкімінің 12 желтоқсандағы өкімімен Жүсіп Төреғалиев қызметінен босатылды.

Сонымен қатар, 2025 жылғы 2 қыркүйекте Қазақстан Республикасының Мемлекеттік қызмет істері агенттігінің Атырау облысы бойынша Әдеп жөніндегі кеңесінің шешімі негізінде Құрманғазы ауданы әкімінің 12 желтоқсандағы өкімімен Жүсіп Төреғалиевқа қызметінен босату түріндегі тәртіптік жаза қолданылғаны нақтыланады.

Осылайша, Бөкейхан ауылдық округіндегі тексерістер жекелеген айыппұлдармен ғана емес, әкімнің қызметінен босатылуымен аяқталды.

Айнұр САПАРОВА

Бүгін, 11:57