Bolashak Operating компаниясының бас директоры тағайындалды

Жиесбек Амангелдіұлы Орынбасаров «Bolashak Operating» компаниясының бас директоры болып тағайындалды.

Ол 1975 жылы дүниеге келген және Атырау мұнай және газ институтын «Мұнай және газ ұңғымаларын бұрғылау» мамандығы бойынша тәмамдаған.

Еңбек жолын «Өзенмұнайгаз» акционерлік қоғамында өндірістік қызмет көрсетудің слесарь‑монтаждаушысы ретінде бастап, кейін әр жылдары Солтүстік Каспий жобасы нысандарында және Солтүстік Бозашы кен орнында газ каротаждау инженері, бұрғылау бойынша супервайзер болып еңбек етті. 

Сондай‑ақ «Каспий Меруерті Оперейтинг Компани Б.В.» филиалында өндіріс жөніндегі менеджердің орынбасары, «Жамбыл Петролеум» ЖШС‑де өндіріс директоры, «PSA» ЖШС‑де техникалық топ менеджері, «Норт Каспиан Оперейтинг Компани Н.В.» филиалында материалдарды басқару тобының жетекшісі, «ӨзенМұнайСервис» ЖШС бас директорының бірінші орынбасары қызметтерін атқарды.

Бұл лауазымға тағайындалғанға дейін ол «Исатай Оперейтинг Компани» ЖШС‑нің өндіріс жөніндегі директоры болып жұмыс істеген. Мұнай‑газ саласында мол тәжірибесі бар маман ретінде жаңа қызметінде де компанияның өндірістік және басқарушылық әлеуетін арттыруға үлес қосуы күтіледі.

«Bolashak Operating» ЖШС — «ҚазМұнайГаз» ҰК АҚ‑ның 100% еншілес компаниясы. Ол Маңғыстау облысында және Каспий теңізінің қазақстандық секторында орналасқан «Болашақ» барлау мен өндіру жобасының жер қойнауын пайдаланушысы болып табылады. Бұл жоба еліміздің энергетикалық қауіпсіздігі мен мұнай‑газ саласының дамуы үшін стратегиялық маңызы бар күрделі бастама саналады.

Бүгін, 17:21