Бостандықты әйгілеген бозторғай жыр

Өткен аптаның жұмасы Астана төрінде көрнекті ақын, Мемлекеттік сыйлықтың лауреаты Несіпбек Айтұлының 75 жылдығы кең көлемде аталып өтті. Әуелі ақын рухына арналған «Бостандық жырының бозжорғасы» атты республикалық жыр мүшәйрасы қорытындыланып, салтанатты іс-шараға ұласты. Кешінде Е.Рахмадиев атындағы мемлекеттік академиялық филармония залында «Дәриға дәурен» атты еске алу концертіне де халық көп жиналды.

Ақынға арналған жыр мүшәйрасының бас жүлдесін қос ақын теңдей бөлісті. Оның бірі Мемлекеттік сыйлықтың лауреа­ты, ақын Серік Ақсұңқарұлы болса, енді бірі белгілі ақын Мұрат Шаймаран жыр додасының қорытынды кешінде өлеңдерін оқыды. Астана қаласының Мәдениет басқармасы қолдауымен өткен салтанатты шарада Несіпбек Айтұлының 75 жылдығын ұйымдастырушы, қазылар алқасының төрағасы, ақын Дәулеткерей Кәпұлы және Мемлекеттік сыйлықтың лауреаты Ғалым Жайлыбай сөз сөйлеп, ақын шығармашылығы хақында толғамды пікір білдірді. Еліміздің түкпір-түкпірінен 100-ден астам ақын қатысқан жыр мүшәйрасының І орнын ақындар Ұларбек Нұрғалымұлы мен Наурызбек Сарша иеленді.

Кешкісін Е.Рахмадиев атындағы мемлекеттік академиялық филармония залындағы «Дәриға дәурен» атты концертте ақынның өлеңдеріне жазылған әндерді елімізге белгілі әншілер шырқады. Қазақ тәуелсіздігі мен елдігін қатар жырлаған Н.Айтұлының әнге айналған сөздері ұлт руханиятының байлығы десе де артық емес. Кеш барысында ақын өмірі мен шығармасынан сыр шертіліп, «аққудың көз жасындай» әндер әуелеген сайын зал сілтідей тынды. Ақ парақтар арасында театр әртістері автордың жалынды жырларына қанат бітірді. Секен Тұрысбектей күйші інісі домбыраның қос ішегі арқылы ақынға деген сағынышын күй ғып төкті. Рамазан Стамғазы, Айгүл Қосанова, Айгүл Елшібаева, Ерлан Рысқали, Бағылан Бәбіжан, Клара Төленбаева, Сәулежан Тағзия, Әйгерім Нартүйе, Перизат Тұрарова, Өзгеріс Шерікбай, т.б әншілер ақын өлеңін әспеттеген ән байрағын жоғары көтерді. Арасында шайырдың эфирде қалған бейнесі мен саңқылдаған дауысы экраннан елмен қауышып отырғандай әсер қалдырды. Кеш автордың қазақ эстрадасындағы шоқтықты туындыларының біріне айналған «Қазақтай ел қайда?» әнімен аяқталды.