БҚО да дуальды оқытумен үш мың шәкірт қамтылған

Батыс Қазақстан облысында кәсіптік-техникалық колледждердің үш мың студенті дуальды оқыту жүйесімен қамтылған. Олар білім алуға берілген уақыттың 60%-ын зауыт-фабрикаларда өткізіп, кәсіби дағдыларын шыңдайды, теориялық білімдерін тәжірибемен толықтырады. Өз кезегінде өңірде маман даярлау сапасы жақсарып, өндіріс орындарындағы жұмысшы тапшылығы жойылып келеді. 

Нұрхан Халиолла Орал политехникалық колледжінің екінші курс студенті. Былтыр 9-сынып бітіргесін дәнекерлеуші мамандығын таңдапты. Қазір испандық арнайы жабдықта дәнекерлеудің түр-түрін үйреніп, шеберлігін шыңдап жүр. 

Нұрхан Халиолла, колледж студенті:

- Дәнекерлеуші мамандығын таңдауым себебі – бұл мамандыққа жұмыс ретінде қарайтын болсақ, сұраныс көп және де табысы да көп болып келеді. Қазір емтиханға дайындалып жатырмын, таврлы және түйістірмелі сол екі әдісті үйреніп жатырмын. Осы оқуды бітіргенде үш түрі: механика, автомат және полуавтомат сол бүкіл затты біліп шыққым келеді.

Білім сапасын жақсарту мақсатында кәсіптік мектептер өңірдегі кәсіпорындармен тығыз байланыс орнатқан. Бүгінде өндіріспен тікелей айналысатын мамандар студенттерге сабақ береді. Мәселен дәнекерлеуден дәріс беруші Айбар Қадыров трансформатор зауытының шебері. 

Айбар Қадыров, өндіріс шебері:

- Жартылайавтомат сваркамен жұмыс жасап үйретеміз осы балаларды. Бізде зауытта тек осындай аппараттар. Тогын қалай қою керек, қандай қалыңдықта қандай тоқпен жұмыс жасау керек, соны үйретеміз. Балалар жақсы үйреніп жатса, ертең практикаға өзімізге, сол жаққа алып кетеміз. 

Сонымен қатар маман даярлау ісінде дуальды оқыту жүйесі де өз нәтижесін беріп келеді. Бүгінде білім басқармасы 26 кәсіпорынмен келісім жасаған. 

Ерденбек Жылқайдарұлы, тілші:

- Өңірдегі 21 мемлекеттік және 14 жеке кәсіптік колледжде 15 мың студент білім алып жатыр. Соның 3 мыңы дуальды оқыту жүйесімен қамтылған. Яғни олар білім ала жүріп, өндіріс орнында жұмыс істейді. Теорияны практикамен ұштастырады, еңбекке машықтанады. Бұл өз кезегінде маман даярлау сапасының жақсаруына әсер етері сөзсіз. 

Кәсіптік колледждің 3-курс студенті Полина Свиридова темір-бетон бұйымдарын өндіретін кәсіпорында екінші жыл еңбек етеді. Осы мерзімде ұжымға, өндіріске үйреніпті. Келешекте еңбек жолын осы жерде жалғастырғысы келеді. 

Полина Свиридова, кәсіптік колледж студенті:

- Мен қазір техник-құрылысшы мамандығына оқып жатырмын. Осы кәсіпорында бір топ бала еңбек етеміз. Жұмыс уақытымыз таңғы 9-дан түскі 4-ке дейін. Біреулері блок жасайды, енді біреуі жұмысшыларға көмектеседі, мен бетон бұйымдарды маркілеймін. Осы жерде жалақы береді. Оқуды аяқтаған соң жұмысқа қалғым келеді. 

Руслан Тлефтинов, өндіріс бастығы:

- Қазір бізде бес студент дуальды схемамен жұмыс істеп жатыр. Жазда 9-10-ға дейін барады саны. Оларға айына 85 мыңнан жалақы төлейміз. Ара-арасында сыйақымен ынталандырамыз. Өздерін жақсы жағынан көрсетуде. Жұмысқа кешікпейді, тіл алғыш. Үйретеміз, оқытамыз. Келешекте ниеттері болса, тұрақты жұмысқа алып қаламыз. Өйткені жұмысшы мамандар тапшы бізде.

Келешекте кәсіптік мектептердегі мамандықтар аясын кеңейту көзделген. Бұл тұрғыда өңірде жұмысшы мамандықтар атласының алты бағыты таңдап алыныпты. 

Зүбайда Ғұмарова, БҚО Білім басқармасының бөлім басшысы:

- Қазіргі таңда бізде дәнекерлеу ісі, ай-ти, жасанды интеллект бойынша мамандарға сұраныс көп. Соған бізде биыл жаңа мамандықтар атласы енгізіліп жатыр. Сол бойынша 2026-2027 оқу жылдарына да жаңа мамандықтарды енгізуді жоспарлап отырмыз. 

Еліміздің еңбек нарығында жыл санап жұмысшы мамандықтарға сұраныс артуда. Бұл ретте техникалық және кәсіптік білім беру саласына артылар міндет айрықша. 

Авторлары: Е. Жылқайдарұлы, Б. Жарылғасов, Э. Аюпов