БҚО да 126 мың теңге қарыз бұрынғы құдағиларды ренжітті

Батыс Қазақстан облысында бұрынғы құдағилар арасындағы 126 мың теңге қарызға қатысты дау сотқа дейін жетті. Алайда соңында әйелдер өзара келісімге келіп, медиативтік келісім жасасты, деп хабарлайды Tengrinews.kz облыстық соттың баспасөз қызметіне сілтеме жасап.

Дау неден туындады?

Іс материалдарына сәйкес, Тасқала ауданының тұрғыны құдағиынан 126 мың теңге қарыз алған. Балалары ажырасқаннан кейін әйелдер арасында түсініспеушілік туындаған.

Қарызды ерікті түрде қайтару мүмкін болмағандықтан, бұрынғы туыстардың бірі сотқа жүгінген.

Талқылау барысында судья тараптарға медиацияның - бейтарап делдалдың қатысуымен дауды реттеу процедурасының артықшылықтарын түсіндірді. Нәтижесінде әйелдер қарызды қайтару бойынша ортақ мәмілеге келіп, медиативтік келісім жасасты. Құжатта олар ақшаны қайтару тәртібі мен мерзімін белгіледі.

Сот келісімді бекітіп, азаматтық іс бойынша өндірісті тоқтатты. Сонымен қатар талап қоюшыға талап арыз беру кезінде төленген мемлекеттік баж салығы қайтарылады.

Сот ұйғарымы әлі заңды күшіне енген жоқ.

Бізді Google-дың негізгі дереккөздер тізіміне қосыңыз