БҚО да экологияны жақсартудың Жол картасы әзірленді

Батыс Қазақстан облысында ауаға шығарылатын зиянды қалдықтарды азайту мақсатында өндіріс орындары жаңғыртылып жатыр.

Сонымен қатар қоғамдық көліктердің орнына электробустар жүргізіле бастады. Мұндай кешенді шаралар аймақтағы экологиялық ахуалды жақсартуға бағытталып отыр.

Оралда электробустармен жолаушы тасымалдана бастағанына бірнеше ай болды. Қаланың басты бағыттарымен қатынайтын қоғамдық көліктің тиімділгі мол. Зиянды қалдық шығармайды және жүргізушілерге де қолайлы.

Данияр Тәженов, жүргізуші:

- Жалпы жұмсақ, жылы, жазда салқын. Климат бақыланып отырады. Жалпы үнемді деуге болады.  

Қаладағы қоғамдық көліктердің басым бөлігі жанармаймен жүреді. Бұл экологияға зиян әрі қымбат. Сондықтан автопарк кезең-кезеңімен жаңартылып жатыр. Соңғы үш жылда 170 жаңа автобус алынды. Құзырлы орган өкілдері арнайы рейд ұйымдастырып, жолаушы тасымалдайтын техникаларды тексеріп тұрады.

Райымбек Сапашев, облыстық Экология департаментінің бас маманы: 

- 2024 жылы 85 автокөлік тексерілді. Оның ішінде 15 белгіленген нормадан асқаны анықталды. 2024 жылғы рейдпен салыстыра келе 2025 жылы бізде нормадан асқан көліктер саны азайды.

Дамир Тапало, қалалық ПБ взвод командирі:

- Биыл экологиялық нормаларды бұзған 11 жүргізуші жауапқа тартылды. Жаңа өзгерістерге сәйкес ескерту шарасы алынып тасталды. Соған сәйкес 3 жүргізушіге 98 мың теңге айыппұл салынды. 

Экологияны жақсарту мақсатында  өндіріс орындарының да қондырғылары  жаңартылып жатыр. Мысалы, биыл Оралдағы жылу электр орталығына құны 3 млрд теңге болатын жаңа салқындатқыш орнатылды. Нәтижесінде станция қуаты артып, Жайық өзенінен алынатын су көлемі екі есе азайған.

Бекболат Қамешов, Жылумен қамтуға жауапты кәсіпорын өкілі: 

- 1960 жылы салынып, әбден тозғанына байланысты кейінгі 10 жыл бойы істемей тұрған турбинаны ауыстырдық. Заманауи жабдық орнатылған соң тұтынатын электр тоғы азайып, су мөлшері кеміді. Қазір 1962 жылы салынған турбинаны жаңарту үшін жобалық құжат әзірленіп жатыр. Қаражат жағын қарастыратын боламыз. 

Аймақтағы экологиялық жағдайды жақсарту үшін арнайы жол картасы әзірленді. Сегіз бағыттан тұратын бағдарлама министрліктің қарауына ұсынылған. Жоба аясында тұрғындардың өмір сапасын арттыруға бағытталған отыздан аса шара өткізу жоспарланып отыр.

Авторлары: Шыңғыс Қалиден, Альбина Құмарғалиева, Болат Жарылғасов