ШҚО да әлеуметтік кәсіпкерліктің жол картасы ұсынылды

Шығыс Қазақстан облысында «Әлеуметтік кәсіпкерлікті» дамытуға арналған жол картасы ұсынылды. Қазір бұл бағытта кәсіп бастап, оны дамытам деушілерге тоғыз түрлі қолдау көрсетіледі. Өңірде кәсіптің бұл түрін толыққанды игеру үшін қоғам белсенділері арнайы бағдарлама әзірледі.

Әлеуметтік кәсіпкерлікке ден қойғандардың бірі - Мәдина Әуренова. Ол Өскеменде сал ауруына шалдыққан балаларды оңалтатын алғашқы орталық ашты. Шығыны көп, табысы аз бағыт іскер келіншекті тығырыққа тіреген. Тіпті орталық жабылудың алдында тұрған. «Биыл қалалық әкімдіктің араласуымен кең кеңсені арзанға жалға алып, бәрі қалпына келе бастады», - дейді.

Мәдина Әуренова, Оңалту орталығының басшысы:

- Осыған дейін мен 300 шаршы метрді 500 мың теңге жалдап отырған болсам, бүгін 700 шаршы метрді шамамен 400-450 мың теңгеге жалға алып отырмын. Бұл әлеуметтік кәсіпкерлік үшін өте үлкен көмек. Егер осыған дейін 33 баланы қамтып келген болсам, бүгінде 60 баланы қамту мүмкіндігім бар.

Осылайша Мәдина әлеуметтік кәсіпкерлік заңында қарастырылған тоғыз жеңілдіктің тек бір түрін пайдаланды. Соның өзіне алты жыл бойы әрең қол жеткізген. 

Алтынай Төлеухан, қоғамдық бірлестік төрағасы:

- Өңірімізде бір переференция ғана жүзеге асып жатыр. Бес миллиондық қайтарымсыз гранттар. Қалған сегіз переференция бізде жұмыс істемейді.

Мамандардың сөзінше, жеңілдетілген салық, тәжірибе алмасу шаралары мен оқыту бағдарламасын ұйымдастыру сияқты бірнеше бағыт мүлдем ұмыт қалған. Сондықтан болар өлкеде әлеуметтік кәсіпкерлер аз. Себебі ақпараттық қолдау жүйесі дұрыс жолға қойылмаған.

Эмин Әскеров, әлеуметтік кәсіпкер:

- Статистика бойынша, 20 регионның ішінде ШҚО 16-орында тұр. Неге десеңіз, әкімдіктен ешқандай  қолдау жоқ.

Қоғам белсенділері осы бір олқылықтың орнын толтыру үшін «Жол картасын» ұсынды. Онда әлеуметтік кәсіпкерлер мен билік өкілдерінің күшін біріктіру жолдары айқындалған.

Ирина Смит, қала әкімінің орынбасары

- «Жол картасын» іске асыруға белсене атсалысамыз. Ақпараттық қолдау жағын нығайтып, түрлі іс шараларды ұйымдастыруға да көмектесеміз. Сондықтан алдағы  атқарылатын істер бір жүйеге келеді деп ойлаймын.

Ендеше болашақта әлеуметтік кәсіпкерлік туралы заңда  көрсетілген жеңілдіктер ішінара емес, толық орындалады деген сенім бар дейді жиналғандар. Ал «Жол картасы» осыған ықпал ететін басты құжатқа айналмақ.

Авторлары: Эльмира Ахметова.Жігер Бабаханов