ШҚО да әлеуметтік жобаларды қаржыландыру көлемі артты

Шығыс Қазақстан облысында әлеуметтік жобаларды қолдауға бағытталған қаржы көлемі ұлғайды. Бұл мақсатқа 26 млрд теңгеден астам бюджет қаражаты бөлінді.

Өңірдің қала-аудандарында мүгедектігі бар азаматтар үшін қолжетімді орта қалыптастыру шаралары жанданды. Атап айтқанда, көшелердегі бағдаршамдар мен көтергіш құрылғылар жаңартылып, қызмет көрсету сапасын арттыруға басымдық берілді. Сонымен қатар ерекше қажеттіліктері бар балаларға арналған оңалту орталықтарын жаңарту жұмыстары жүріп жатыр.

Мадина Әуренова Шығыс Қазақстан облысында тірек-қимыл аппараты бұзылған балаларға арналған алғашқы оңалту орталығын ашты. Өзі де ерекше баланың анасы әрі білікті педагог. Қазір орталықта бірнеше реабилитолог маман жұмыс істейді. Бүгінде балаларға сапалы әрі кешенді көмек көрсетіледі.Кәсіпкер жобаны мемлекеттік-жекеменшік әріптестік арқылы іске асырған. Әкімдік орталыққа ғимарат бөліп, бюджет қаражаты есебінен күрделі жөндеу жүргізілді.

Мадина Әуренова, Балаларға арналған оңалту орталығының директоры:

- Басқа мемлекеттерде балаларына оңалту шараларын іздеу бойынша өзінің отбасынан шалғайда, өзінің басқа балаларынан шалғайда болуына тура келген еді. Осы негіз орталықтың ашылуына себепші болды. Ал бүгінгі күні ата аналар осы жерде үздіксіз оңалту шараларын ұйымдастыру мүмкіндіктері бар.

Биыл арнайы орталықтар жан басына шаққандағы қаржыландыру жүйесіне көшеді. Емдік гимнастика күн сайын 10-12 сағатқа дейін созылады. Соның нәтижесінде дәрігерлер үміт үзген балалар алғашқы қадамдарын жасап жатыр. Бұған қоса, жаңа ғимаратта тұрмыстық зорлық-зомбылық құрбандарына кешенді көмек көрсетіледі. Пациенттермен психологтар жұмыс істейді. Ал балаларға ойын залдары, демалыс бөлмелері қарастырылған.

Сәния Әубәкірова, «Үлбі» халыққа әлеуметтік қызмет көрсету орталығының директоры:

- Дағдарыс бөлімі көшіп кеткен соң біз балалар санын көбейттік. Оларды арнайы әлеуметтік қызметтермен қамтыдық, қазір біздің бөлімшеге 160 бала келеді.

Өскемен қаласында әлеуметтік бағдарламалар аясында жүзу бассейні жөндеуден өтті. Онда егде жастағы жүздеген адам емдік дене шынықтырумен айналысады. Бұл зейнеткерлерге арналған спорт кешені.

Александр Коробейников, зейнеткер:

- Мен мұнда үш жылдан бері келіп жүрмін. Бұрын бәрі ескі болатын, қазір жақсы жөндеу жүргізілді. Заман талабына сай болды. Қазір менің жасым 71-де, үнемі осында келіп шынығамын.

2026 жылы республикалық бюджеттің әлеуметтік-еңбек саласына бөлінетін қаржы 15 пайызға өсіп, 6 трлн-нан асады. Бұл қаражат мүгедектігі бар жандарды протездермен, есту және сөйлеу аппараттарымен қамтамасыз етуге бағытталады. Сонымен қатар шалғай аудандарда арнайы оңалту орталықтары ашылады.

Авторлары: Рүстем Қайратұлы, Вячеслав Ветлугин, Дмитрий Пыхтин