Қостанай облысында балалар спортын қаржыландыру артты

Сонымен биылдан бастап орташа есеппен әр балаға 415 мың теңге қаржы қарастырылып отыр.

Өсім екі есеге жуық. Бұл өзгеріс спорт мектептерінің дамуына ықпал ете ме? Қазіргі кезде өңірлерде спорт нысандары қаншалықты қолжетімді?

Екі жыл бұрын Қостанайда «Рысь» деп аталатын хоккей академиясы ашылды. Бүгінде мұнда 5-тен 8 жасқа дейінгі 140 бала кәсіби тұрғыда хоккеймен айналысады. Сегіз жасар қақпашы Ульяна Мизенцеваның конькиге тұрғанына үш жыл болыпты. Қазір өз қатарластарының арасындағы мықты ойыншылардың бірі. 

Ульяна Мизенцева, хоккей академиясының тәрбиеленушісі:

- Бастапқыда шабуылшы болғым келген. Сосын қақпада тұрамын деп шештім. Өйткені менің ыңғайым соған келеді.

Соңғы екі жылда Қостанай балалар хоккейінің орталығына айналды десек артық айтқандық емес. Жаңадан салынған мұз айдыны сарайы қашан да жас спортшыларға толы. 

Айдана Момынова, Қостанай қаласының тұрғыны:

- Хоккейді осында келіп көрсеттім, ұлыма ұнады. Бұл академияда құрал-жабдықтардың бәрі тегін беріледі, экипировкасы. Жаттығулар тегін. Бәрі ыңғайлы. Ата-аналар күтетін орында бар. 

Академияда балалар дайындығына аса жауапкершілікпен қарайды. Жаттықтырушыларды Барыс клубынан, Ресейден алдырған. Сондықтан алдағы мақсаттары биік. 

Рустам Донанов, хоккей академиясының басшысы:

- Академия құрғанымыздағы мақсат, Мемлекет басшысының тапсырмасына сәйкес бұқаралық спортты, оның ішінде олимпиадалық спорт түрлерін дамыту. Әр жыл сайын болашақта ел құрамасында ойнайтындай екі-үш баланы тәрбиелеп шығаруды жоспарлап отырмыз. 

Ал мынау олимпиада резервтерін дайындайтын балалар және жасөспірімдер спорт мектебі. Негізгі бағыты грек-рим, еркін күрес және таэквондо. Бұл мектептің 800-ге жуық тәрбиеленушісі бар. Биылдан бастап енгізілетін жан басына шаққандығы қаржыландыру жүйесі осындай ірі спорт мектептері үшін тиімді. Алайда оның өзіндік талаптары да бар.  

Мақсат Ережепов, жасөспірімдер мен балалар олимпиадалық резерв мектебінің директоры:

- Қаржыландыру кезінде көбісінде сұрақтар туындайды. Кейбір балалар дұрыс результат көрсете алмаса нәтиже, олардың жарысқа шығуы кішкене азаяды. Ал керісінше нәтижені жақсы көрсетсе, оған бүкіл жағдай жасалады.

Қалай дегенмен де, биылдан бастап балалар спортын қаржыландыру біршама артады. Өңірде 30 спорт мектебі жұмыс істейді. Олар 18 мыңнан астам баланы қамтып отыр. 

Ерболат Жабағин, облыстық дене шынықтыру және спорт басқармасының бас маманы:

- 18 млрд-тан астам қаржы спорт саласына бөлінді. Бұған дейінгі жылмен салыстырғанда 4 млрд-қа көп. Бұл 18 млрд қаржының 45 пайызына дерлік бөлігі балалар спортына бөлінген. 

Ресми мәліметке сүйенсек, бүгінде облыс халқының 48 проценті спортпен тұрақты түрде айналысады. 

Мағауия Қалиев, Ермек Мұхамедияров