БҚО да өнім бағасын асырып сатқан кәсіпкерге айыппұл салынды

Батыс Қазақстан облысы бойынша сауда және тұтынушылардың құқықтарын қорғау департаментінің басшысы Эльмира Қиматованың мәлім еткеніндей, 2025 жылдың желтоқсанында Сауда және интеграция министрінің бұйрығымен әлеуметтік маңызы бар азық-түлік тауарларының тізбесі 19-дан 31-ге дейін кеңейтілді.

Эльмира Нұрқызының сөзіне қарағанда, тізбеге қияр, қызанақ, алма, ірімшік, қара шай, қаймақ секілді азық-түлік өнімдері енгізілді.

— Шеттен әкелінетін, сондай-ақ жергілікті жылыжайда өсірілетін өнімдер болса да, қияр мен қызанақтың бағасы қала тұтынушыларының көңілінен үнемі шыға бермейді. Кәсіпкерлік субъектілері әлеуметтік маңызы бар азық-түлік тауарларына қатысты шекті сауда үстемесін заңнамаға сәйкес 15 пайыздан асырмауы тиіс болса да, бұл талапты бәрі бірдей сақтамайды, — дейді Эльмира Қиматова.

Оның айтуынша, департамент наурыз айында Орал қаласының сауда желілеріне қиярдың 117,3-тен 236,9 пайызға дейін, қызанақтың 66,6 пайыз сауда үстемесімен түскендігін анықтады.

Кәсіпкердің бұл әрекеті «Сауда қызметін реттеу туралы» ҚР Заңының 9-бабына қайшы келеді. Онда шекті сауда үстемесі өнім өндірушінің босату немесе көтерме сауда арқылы берушінің бағасынан 15 пайыздан аспауы тиіс екендігі көрсетілген.

— Осыған байланысты департамент кәсіпкерге қатысты әкімшілік іс қозғап, оған айыппұл салынды, — деп қосты департамент басшысы.

Еске сала кетейік, бұдан бұрын БҚО-да өнім жеткізушінің балабаақшаларға майдың бағасын екі есеге қымбат сатқанын жазған болатынбыз.