БҚО да перзентхана басшысы ақталды

Оралда төрт жылға созылған сот процесіне нүкте қойылды. Облыстық перинатальды орталықтың бұрынғы директоры Жанна Ділманова бүгін сот үкімімен кінәсіз деп танылды. 

Еске сала кетсек, перзентханада лифтер болып жұмыс істеген 50 жастағы әйел 2021 жылдың желтоқсанында жеделсатыға қыстырылып, жан тапсырған еді. Тергеу барысында 1981 жылдан бері үздіксіз істеп келе жатқан лифтінің әбден тозығы жеткені анықталып, жарамсыз қондырғыны уақытында тоқтатпаған және жөндетпеген  мекеме басшысына айып тағылды. Бүгін барлық мән-жайды таразылаған қалалық сот орталық басшысын жазықсыз деп таныды. 

Айзада Жұмағұлова, Орал қалалық сотының судьясы:

- Қылмыстық процессуалдық Кодекстің бірнеше бабына сүйене отырып, Орал қалалық соты Ділманова Жанна Ахметқызын кінәсіз деп таныды. Сот оның әрекетінде қылмыс құрамы жоқ екенін анықтады. Жәбірленуші тараптың 15 миллион теңге өтемақы беру туралы талабы да қанағаттандырылмайды.