Brent бағасы екі аптаға жарияланған бітімнен кейін 13% ға төмендеді

Brent маркалы мұнай бағасы АҚШ пен Иран арасындағы уақытша бітім туралы жаңалықтан кейін күрт төмендеді. 

8 сәуір таңғы сағат 8:00-де Лондондағы ICE Futures биржасында маусымдық фьючерстер $14,31-ге (13,1%) арзандап, барреліне $94,96 болды. Алдыңғы күні Brent $0,5-ке төмендеп, $109,27 болған еді, деп хабарлайды INTERFAX.

WTI маркалы мұнай да құлдырады: Нью-Йорктағы NYMEX биржасында мамырлық келісімшарттар $16,2-ге (14,34%) арзандап, барреліне $96,75-ке түсті. Бұған дейінгі саудада WTI $0,54-ке қымбаттап, $112,95 болған.

Бағаның құлдырауына АҚШ президенті Дональд Трамптың Иранға қарсы соққыларды екі аптаға тоқтататыны туралы мәлімдемесі әсер етті. Ол бұл шешімді Ормуз бұғазының толық әрі қауіпсіз ашылуына байланысты қабылдағанын айтты. Иран да атысты тоқтатуға келісім берді.

Иранның сыртқы істер министрі Аббас Аракчи екі апта бойы Ормуз бұғазынан қауіпсіз өту мүмкін болатынын мәлімдеді. Сарапшылар бұл келісім ұзақ мерзімді шешімге негіз бола алатынын, бірақ тәуекелдер сақталатынын атап өтті.

Сонымен қатар, АҚШ мұнай институты елдегі қорлар өткен аптада 3,72 млн баррельге артқанын хабарлады. Ал сарапшылар керісінше, 1 млн баррельге азаюы мүмкін деген болжам жасаған еді.