BTS пен Blackpink ке фейк билеттер Алматы полициясы турагент ісі туралы айтып берді

Алматы полициясы сүйікті орындаушыларының концертіне баруды армандаған туристер тарапынан бұрын шағым түскен туристік агенттің қызметіне қатысты тергеу нәтижесін жариялады, деп хабарлайды Tengri Travel.

Полиция не деді?

Медеу аудандық Полиция басқармасының мәліметінше, аталған факт бойынша алаяқтық белгілері бойынша қылмыстық іс аясында сотқа дейінгі тергеу амалдары жүргізілген.

"Сотқа дейінгі тергеу барысында Қазақстан Республикасы ҚІЖК талаптарына сәйкес істің мән-жайы жан-жақты әрі объективті зерттеліп, қолда бар материалдар мен жиналған дәлелдемелерге құқықтық баға берілді", - деп атап өтті ведомство.

Тергеу қорытындысы бойынша қылмыстық іс тоқтатылды.

"Тергеу нәтижесі бойынша қылмыстық іс Қазақстан Республикасы ҚІЖК-нің 35-бабы 1-бөлігі 2-тармағы негізінде, іс-әрекетте қылмыстық құқық бұзушылық құрамының болмауына байланысты тоқтатылды", - делінген полиция жауабында.

Ведомство қабылданған процестік шешім аудан прокуратурасымен келісілгенін нақтылады.

Бұл ретте полиция мүліктік немесе басқа да азаматтық-құқықтық талаптар болған жағдайда өтініш берушілер сотқа жүгіне алатынын түсіндірді.

"Мүліктік немесе өзге де азаматтық-құқықтық талаптар болған жағдайда, мүдделі өтініш беруші бұзылған құқықтары мен заңды мүдделерін қорғау және қалпына келтіру үшін азаматтық іс жүргізу тәртібімен сотқа жүгінуге құқылы", - деп хабарлады ведомство.

Бұған дейін әлеуметтік желілерде қазақстандық туристік агент И. А. туралы ақпарат жарияланған еді. Жазбаларда әртүрлі елден адамдар одан шетелдік әртістердің, соның ішінде BTS және BLACKPINK топтарының концерттеріне тур сатып алғаны айтылған.

Атап айтқанда, әлеуметтік желілерде 12–13 маусымда Пусанда өткен BTS концертіне сапарлар туралы хабарланды. Жарияланым авторларының мәліметінше, турға ұшу, қонақүйде тұру және концерт билеті кірген.

"167 мың рубльге (шамамен 883 мың теңге) ол барып-қайту ұшуын, жақсы қонақүйге орналасуды және, әрине, концерт билеттерін уәде еткен. Тыйым салынған "инстада" ол Азия елдері бойынша "авторлық турлар" таңдайтынын айтып, Канье Уэстің Ыстамбұлдағы концертінен фотолар жариялайды. Нәтижесінде жолдаманы 100-ге жуық адам, соның ішінде Ресей Федерациясының ондаған азаматы сатып алған", - деп атап өтілген Shot жазбасында.

Сондай-ақ жарияланымдарда бұған дейін Blackpink концерттеріне тур сатып алушылар да осындай мәселелерге тап болғаны айтылған. Әлеуметтік желілердегі мәліметтерге сүйенсек, кейбір туристер ұшып барғаннан кейін кейін қонақүй брондау, концерт билеттері және кері қайту рейстерінде қиындықтар барын білген.

"Нәтижесінде А.-ның әрекетінен келген жалпы шығын 3,5 миллион рубльден (шамамен 18,5 миллион теңге) асуы мүмкін, оның 2 миллионы - ресейліктерге тиесілі (шамамен 10,6 миллион теңге). Бұл ретте ол кейбір клиенттеріне ақшасын қайтарған, бірақ олардың бәрі - жергілікті блогерлер", - деп атап өтті басылым.

Жарияланым авторлары кейбір сатып алушылар ақшасын қайтаруға тырысқаны туралы да хабарлады. Бұл ретте тараған ақпаратқа сәйкес, туристік агент клиенттердің бір бөлігіне қаражатты қайтарған.

Тағы оқыңыз: Алматыға чемоданмен келіп, ұшаққа міне алмады: ақтөбелік туристерге не болды?

Google News арқылы жаңалықтарымызды қадағалаңыз