Бұл ЖИ дің кінәсі емес вице министр әкімдіктің тазартылған қоқыс туралы фотоесебі туралы

Жасанды интеллект және цифрлық даму вице-министрі Ғиззат Байтұрсынов Алматы әкімдігінің қоқыс "жиналғаны" туралы фотоесебіне қатысты даулы оқиғаға пікір білдірді, - деп хабарлайды Tengrinews.kz тілшісі.

Үкіметте өткен брифинг кезінде журналист Байтұрсыновтан нейрожелілердің дамуы жаңа мәселе тудырмай ма деп сұрады. Себебі қызметкерлер жұмысты орындаудың орнына, оның орындалғаны туралы сенімді фото және видеоесептерді жай ғана генерациялай салуы мүмкін.

Вице-министр жасанды интеллект (ЖИ) жұмысты жеделдету, процестерді автоматтандыру және үлкен көлемдегі ақпаратты өңдеу үшін қолданылуы мүмкін екенін, бірақ ол адамды алмастырмайтынын мәлімдеді.

"ЖИ ешқашан адамдарды алмастырмайды. Ол әрдайым азаматтарымыздың көмекшісі, ассистенті ретінде әрекет етеді. Шартты түрде айтқанда, сіз ЖИ есебінен қандай да бір жұмысты жылдамдатып, кейбір бизнес-процестерді автоматтандыра аласыз. Егер үлкен ақпарат ағыны болса, ЖИ-ді сүзгі ретінде пайдалануға болады. Бірақ, қалай болғанда да, соңғы шешімді адам қабылдайды, біздің ұстанымымыз осындай", - деді Байтұрсынов.

Шенеунік Алматыдағы қоқыс "жиналғаны" туралы фотоесепке қатысты даулы оқиғаға жеке тоқталып өтті.

Еске салайық: мамырда Алматыда жанжал шыққан болатын. Жергілікті тұрғын Threads желісінде мектеп жанындағы қоқысқа шағымданған. Бұған жауап ретінде аудандық әкімдік сол аумақтың тазарлыған суретін жариялады. Желі қолданушылары ракурстың сәйкестігін және кескіннің ЖИ көмегімен өңделген болуы мүмкін екенін байқаған.

Әлеуметтік желілердегі даудан кейін тексеру жүргізіліп, оның нәтижесі бойынша мердігер абаттандыру ережелерін бұзғаны үшін әкімшілік жауапкершілікке тартылды. Әкімдіктегілер бұл учаскеде нақты тәртіп орнатылғанына сендірді: барлық қоқыс шығарылып, аумақ тиісті күйге келтірілген.

"Бұл жерде ЖИ-дің кінәсі жоқ, мұнда ЖИ құрал ретінде әрекет етіп тұр. Осы жұмысты істемеген адамнан мұның себебін сұрау керек. Ал ЖИ - бұл тек құрал, оны жақсы мақсатта да, осындай мақсатта да қолдануға болады", - деп түсіндірді вице-министр бұл жағдайды.

Бізді Google-дың негізгі дереккөздер тізіміне қосыңыз