Жасанды интеллекттен сұраңыз вице министр қазақстандықтардың табысының өсуі туралы

Былтырғы жылдың қорытындысы бойынша Қазақстан экономикасы 6,5 пайыз өскеніне қарамастан, инфляцияға байланысты көптеген қазақстандық материалдық жағдайының жақсарғанын әлі сезіне қоймады. Бұл туралы Үкіметте өткен брифингте ұлттық экономика вице-министрі Арман Қасенов айтты, деп хабарлайды Tengrinews.kz тілшісі.

Қазақстандықтар экономикалық өсімді неге сезінбей отырғаны туралы сұраққа жауап бере отырып, Қасенов халықтың номиналды табысы өсіп жатқанын, алайда инфляция ұзақ уақыт бойы осы өсімді "жеп қойғанын" айтты.

Оның айтуынша, 2025 жылы халықтың нақты табысы 2 пайыздан астамға қысқарған, бірақ 2026 жылдың бірінші жартыжылдығында бұл көрсеткіш алғаш рет оң аймаққа шықты.

"Алты айдың қорытындысы бойынша халықтың нақты табысы 0,1 пайыз өсті. Номиналды мәнде табыстың өсуі 11 пайыздан асты", - деді ол.

Вице-министр ұзақ мерзімді перспективада экономикалық өсім әрдайым халық табысының артуына әкелетінін, бірақ кейбір кезеңде бұл көрсеткіштер арасында теңгерімсіздік туындайтынын атап өтті. Ол мұндай алшақтық COVID-19 пандемиясынан кейін, яғни экономикалық белсенділік төмендегеніне қарамастан, бүкіл әлем елдері халыққа қолдау көрсеткен кезде қалыптасқанын түсіндірді.

"Егер динамикаға қарасаңыз... Жасанды интеллект бұл графикті сізге тез арада сызып береді. 2000 жылдан бері халықтың нақты табысының өсуі қалай болғаны туралы сұрау салыңыз, сонда сіз нақты табыстың өсуі ЖІӨ өсімімен салыстырғанда озу қарқынымен жүргенін көресіз", - деді Қасенов.

Кейінгі бір жарым жылда экономика осы теңгерімді қалпына келтіру кезеңінен өтті, деп толықтырды шенеунік.

"Біз мұны жартыжылдық қорытындысынан көріп отырмыз. ЖІӨ өсімі мен халықтың нақты табысы арасындағы алшақтық екі есеге жуық қысқарды. Осы сәттен бастап халықтың нақты табысының өсуі оң аймақта болатынына нық сенімдімін", - деп түйіндеді ол.

Бүгін Үкімет отырысында премьер-министрдің орынбасары - ұлттық экономика министрі Серік Жұманғарин қазақстандықтардың табысы ұзақ уақыттан бері алғаш рет төмендеуін тоқтатып, бірінші тоқсан қорытындысы бойынша 0,1 пайыз өскенін хабарлады. Оның айтуынша, бұған инфляцияның бәсеңдеуі септігін тигізген, ал Үкімет 2026–2029 жылдарға арналған Халықтың табысын арттырудың кешенді жоспарын бекітті.

Бұған дейін ЖІӨ өсімі неге әрдайым азаматтар табысының артуын білдірмейтінін егжей-тегжейлі талдаған болатынбыз. Экономистердің пікірінше, халықтың әл-ауқатына инфляция, еңбек өнімділігі, экономика құрылымы және табыстың бөлінісі әсер етеді, сондықтан адамдар экономикалық өсімнің нәтижесін кешігіп сезінуі мүмкін.

Google News арқылы жаңалықтарымызды қадағалаңыз