Бұрынғы президент Чикагода 850 миллион доллар тұратын орталық салған

Aikyn.kz бұрынғы президенттің Чикагода орталық салғандағы мақсатын abcnews.com сайтының хабарламасына сүйеніп талдайды.

Экс-президент Барак Обама мен бұрынғы бірінші ханым Мишель Обаманың пікірінше, бұл орталық олардың Ақ үйдегі 8 жылдық қызметінің символдық қорытындысы ғана емес, болашақ ұрпаққа арналған инвестиция саналады.

Чикагоның оңтүстік бөлігінде орналасқан Обама президенттік орталығының құрылысына 850 миллион доллар жұмсалған. Кешен құрамына музей, қоғамдық іс-шараларға арналған аудитория, кітапхана филиалы, спорт нысандары, саябақтар және Обама қорының кеңселері кіреді. Президенттік архив толық цифрлық форматқа көшірілген. Барак Обаманың айтуынша, орталықтың басты мақсаты – жаңа буын көшбасшыларын тәрбиелеу.

«Қазір адамдардың көңілі түсіп кеткендей көрінуі мүмкін. Бірақ тарихта бұндай кезеңдер әрдайым болған. Кейін міндетті түрде жаңа ұрпақ келеді және жаңа көшбасшылар пайда болады», – дейді ол.

Ақ үйден кеткеннен кейін Обама қоғамдық-саяси пікірталастарға белсенді араласудан саналы түрде бас тартқанын айтады. Оның пікірінше, қазіргі рөлі саясаттағы ойыншы емес, жастарға бағыт-бағдар беретін тәлімгер болу.

Телеарнаға берген сұхбат барысында бұрынғы президент өзінің ең үлкен жетістігі ретінде 2010 жылы қабылданған «Қолжетімді денсаулық сақтау туралы заңды» (Affordable Care Act) атаған. Бұл реформа ондаған миллион америкалықтың медициналық сақтандыруға қолын жеткізді.

«Барлық саяси қарсылықтарға қарамастан, бұл заң 50-60 миллион адамның өміріне оң әсерін тигізді және әлі күнге дейін пайдасын тигізіп келеді», – дейді Обама.

Мишель Обама да орталықтың негізгі идеясы үміт пен өзгеріс құндылықтарын сақтау екенін атап өткен. Бұрынғы бірінші ханым «қоғамда түңілу күшейген сайын адамдар жақсы болашаққа ұмтылып, өзгеріс жасауға дайын болады» дейді.

Президенттік орталықтағы ерекше экспозициялардың бірі – АҚШ тарихындағы алғашқы қара нәсілді президент отбасының Ақ үйге келуі туралы бөлім. Мишель Обаманың айтуынша, бір кездері көпшілік бұлай болатынына сенбеген.

«Көп адам қара нәсілді отбасы Ақ үйде ешқашан тұрмайды деп ойлады. Бірақ Америка қоғамының басым бөлігі басқаша ойлайтыны дәлелденді», – дейді ол.

Барак Обама демократияның басты артықшылығы пікір алуандығында екеніне сенеді. Ол «кез келген азамат билікпен келіспеуге, өз пікірін ашық айтуға құқылы» екенін айтады. Ал түпкілікті шешімді халық сайлау арқылы қабылдайды.

«Демократияның негізі – әр адамның «Мен келіспеймін» деп айту құқығы. Кейін біз пікірталас жүргіземіз, ал соңғы сөзді сайлаушылар айтады», – дейді бұрынғы президент.

Обама жұбының пікірінше, демократияның болашағы жеке тұлғаларға емес, қоғамның жаңа көшбасшыларды тәрбиелей алу қабілетіне байланысты.