Былтыр Өзбекстанда 5 мыңнан астам жемқорлық қылмысы анықталды

Сыбайлас жемқорлыққа қарсы іс-қимыл агенттігінің басшысы Акмал Бурхановтың мәлімдеуінше, 2025 жылы қылмыстар саны 8,6%-ға төмендеді. Атап айтқанда, былтыр 5 222 факті анықталса, 2024 жылы мұндай 5 716 дерек тіркелген еді.

Сыбайлас жемқорлық қылмыстары Денсаулық сақтау, Мектепке дейінгі және орта білім беру министрліктерінде, сондай-ақ жергілікті әкімдіктерде көп жасалған.

Агенттік басшысының мәліметіне сай, 2025 Ферғана және Сұрхандария облыстарында пара беру және пара алу деректері жиі тіркелген. Бұл ретте Хорезм, Қашқадария, Ташкент және Самарқанд облыстарындағы қылмыс саны азайды.

— Сыбайлас жемқорлық қылмыстар үшін аудандық және қалалық деңгейдегі 12 әкім жауапқа тартылды. Жалпы, 300-ден астам факті жергілікті әкімдіктерде тіркелді. Яғни, олардың 80%-дан астамын әкімнің көмекшілері жасаған, — деді Акмал Бурханов.

Бұған дейін хабарлағанымыздай, Өзбекстан үкіметі жемқорлықпен күрес үшін мемлекеттік сатып алу жүйесіне жасанды интеллектті енгізуді жоспарлап отыр.

Сондай-ақ, Өзбекстан билігі ЖИ-ді енгізе отырып, 2 мыңнан астам шенеунікті жұмыстан босатпақ.