Бюллетеньді суретке түсіру, сауалнамалар және үгіт насихат. Қазақстандықтарға сайлау алдындағы тыйымдар туралы ескертілді

Бас прокуратура қазақстандықтарға Құрылтай депутаттарының сайлауы қарсаңында сақталуы тиіс ережелерді еске салды, деп хабарлайды Tengrinews.kz.

Прокуратура өкілдері сайлау процесі жалпы құқықтық аяда өтіп жатқанын хабарлады. Бұл ретте сайлау заңнамасын бұзудың сегіз дерегі анықталды: қоғамдық пікірге заңсыз сауалнама жүргізудің үш дерегі және тыйым салынған кезеңде үгіт жүргізудің бес жағдайы тіркелген.

Жеті жеке тұлға және бір заңды тұлға әкімшілік жауапкершілікке тартылды.

"Олардың барлығы кінәсін мойындады, әрекеттеріне өкінді және онлайн-платформалардағы заңсыз жарияланымдарын жойды", - делінген Бас прокуратураның хабарламасында.

Үгіт қашан аяқталады?

Бас прокуратура сайлау алдындағы үгіт 2026 жылғы 22 тамыз сағат 00:00-де аяқталатынын еске салды.

Үгіт жүргізуге 22 және 23 тамызда, яғни дауыс беру алдындағы күні және сайлау күні тыйым салынады.

Бұл ретте бұрын орналастырылған баспа үгіт материалдары бұрынғы орындарында қала береді. Бұл интернеттегі жарияланымдарға да қатысты. Алайда бұрын орналастырылған үгіт материалдарын интернет-ресурстардың басты беттеріне шығаруға болмайды.

Тыйым салынған кезеңде үгіт жүргізгені үшін Әкімшілік құқық бұзушылық туралы кодекстің (ӘҚБтК) 102-бабы бойынша әкімшілік жауапкершілік қарастырылған.

"Осы құқықтық шектеулер сақталмаған жағдайда үгіт жүргізуге тыйым салынған кезеңде оны жүргізгені үшін Әкімшілік құқық бұзушылық туралы кодекстің 102-бабы бойынша әкімшілік жауаптылық туындайды (жеке тұлғаларға – 15, шығын кәсіпкерлік субъектілеріне немесе коммерциялық емес ұйымдарға – 20, орта кәсіпкерлік субъектілеріне – 25, ірі кәсіпкерлік субъектілеріне – 35 айлық есептік көрсеткіш мөлшерінде айыппұл салуды көздейді)", - делінген Бас прокуратура хабарламасында.

Сауалнама нәтижесін жариялауға болмайды

Сондай-ақ прокуратура дауыс беру күніне дейін бес күн бұрын және сайлау күні БАҚ-та және онлайн-платформаларда қоғамдық пікір сауалнамаларының нәтижесін, сайлау нәтижесін болжамдарын және сайлауға қатысты басқа да зерттеулерді жариялауға тыйым салынатынын еске салды.

Бұдан бөлек, дауыс беру күні дауыс беруге арналған үй-жайлар мен пункттерде қоғамдық пікірге сауалнама жүргізуге тыйым салынады.

Бұл талаптарды бұзғаны үшін ӘҚБтК-нің 120-бабының 2-бөлігі бойынша жауапкершілік қарастырылған.

Толтырылған бюллетеньді суретке түсіргені үшін де жазалануы мүмкін

Прокуратура толтырылған бюллетеньді фото мен видеоға түсіруге және оны дауыс беру күні таратуға тыйым салынғанына ерекше назар аударды.

Сондай-ақ азаматтарға бейбіт жиналыстар өткізу ережелері туралы ескертілді. Жиналыстар, митингілер мен пикеттер үшін хабарлау тәртібі, ал демонстрациялар мен шерулер үшін келісу тәртібі қолданылады.

Белгіленген тәртіпті бұзғаны үшін ӘҚБтК-нің 488-бабы бойынша әкімшілік жауапкершілік қарастырылған. Егер мұндай әрекеттер азаматтардың, ұйымдардың, қоғамның немесе мемлекеттің құқықтары мен заңды мүдделеріне елеулі зиян келтірсе, Қылмыстық кодекстің 400-бабы бойынша қылмыстық жауапкершілік те туындауы мүмкін.

Сонымен қатар прокуратура жалған мәліметтер мен заңсыз контент таратқаны үшін жауапкершілік туралы ескертті. Заңбұзушылықтың сипатына қарай Қылмыстық кодекстің 274-бабы бойынша қылмыстық жауапкершілік те, ӘҚБтК-нің 456-2-бабы бойынша әкімшілік жауапкершілік те қолданылуы мүмкін.

Бас прокуратура сайлау процесінің барлық қатысушысын заңнама талаптарын сақтауға және заңбұзушылықтарға жол бермеуге шақырды.

Құрылтай (Қазақстанның бірпалаталы парламенті) сайлауы 23 тамызға белгіленген.
Құрылтай пропорционалды жүйе бойынша сайланатын 145 депутаттан тұрады. Сайлауға 7 саяси партия қатысады.

Бұған дейін Қазақстанның Орталық сайлау комиссиясы Құрылтай сайлауында бюллетень қай жағдайда жарамсыз деп танылатынын және қандай қателіктер сайлаушының дауысы есептелмеуіне әкеп соғатынын түсіндірген болатын.

Құрылтай сайлауы: ОСК бюллетень қай жағдайда жарамсыз деп танылатынын түсіндірді

Алдағы сайлау Қазақстанда 1991 жылдан бергі оныншы парламенттік сайлау және 2026 жылғы конституциялық референдумда қабылданған жаңа Конституцияға сәйкес құрылған Құрылтайға бірінші сайлау болмақ. Еске сала кетейік, бүгінде Мәжіліс пен Сенат жұмысын тоқтатып, депутаттар таратылған.

Google News арқылы жаңалықтарымызды қадағалаңыз

Жазылу