Чехия бизнесі Қазақстанға неге қызығып отыр

– Қазақстан территориялақ жағынан ғана емес, амбициясы тұрғысынан да алып ел. Астананың жарқын келешегі, Алматының өндірістік қуаты, Каспийдің бай энергетикалық қоры – бұлардың бәрі арқылы Қазақстан трансформация мен көшбасшылыққа қабілетті екенін дәлелдеп қойған. Бүгінде бұл ел құрлықтар арасындағы көпір ғана емес, сондай-ақ инновация мен стратегиялық инвестициялардың жаһандық орталығы. ЖІӨ бойынша да сіздердің еліңіз – Орталық Азиядағы ең дамыған мемлекеттердің бірі. ЕО-да біз үшін мұндай ЖІӨ көрсеткіші – арман ғана, – деді ол.

Сонымен бірге, Чехия Премьер-министрі Қазақстан мен Чехия қарым-қатынасы өзара сыйластық және ортақ жобаларды сәтті жүзеге асырудағы тәжірибе негізінде құрылғанын атап өтті.

– Біздің мұнда келуіміз тығыз байланыс пен серіктестіктің терең тарихын дәлелдейді. Бұған дейін біраз жобаны бірлесіп, табысты атқардық. Бірақ ең жақсы дүниелер әлі де алда. Біз Қазақстанға уақытша қызығушылықпен емес, ұзақ мерзімді стратегиялық тұрғыда қараймыз. Алайда стратегия әзірге сөз жүзінде қалып отыр. Оны іске асыру үшін үздік мамандарымызды алып келдік, – деді Андрей Бабиш.

Сонымен бірге, ол соңғы жылдарда қос мемлекет арасындағы тауар айналымы артып, инвестициялық серіктестік ілгерілегенін, соның арқасында экономикалық ынтымақтастық нығайғанын мәлімдеді.

Бұдан бөлек, онымен бірге Чехиядан энергетика, қорғаныс, көлік, тау-кен қазу өнеркәсібі т.б. секторлардағы бизнес өкілдері келгенін атап өтті.

Чехия Премьер-министрі форум нәтижесінде серіктестік кеңейіп, жаңа жобалар жүзеге асатынына сенім білдірді.

Айта кетейік, бұған дейін Қазақстан Чехияны сенімді серіктес ретінде қарастыратынын жазғанбыз.