Цифрландыру жай есеп үшін емес, нақты өнімділікке жұмыс істеуі керек Әшімбаев

- Тағы бір маңызды міндет – агроөнеркәсіп субъектілерін мемлекеттік қолдауды объективті цифрлық деректермен байланыстыру. Мемлекеттік қолдау тетіктері нақты көрсеткіштерге сүйенуі қажет. Егер мемлекет заманауи технологияларға субсидия берсе, оның нәтижесі де айқын көрінуге тиіс деп есептейміз. Қанша су үнемделді, өнімділік қалай өзгерді, мал шаруашылығының тиімділігі нақты қаншалықты артты, жерді пайдалану тиімділігі қалай жақсарды деген сауалдарға цифрлық платформа аясында жауап берілу керек. Мұндай тәсіл бюджет қаражатын бөлуді барынша ашық және қолдау шараларын нысаналы әрі нәтижелі ететіні сөзсіз. Осылайша, цифрландыру жай есеп үшін немесе тек ақпарат үшін емес, саланың нақты өнімділігін арттыру және жаңа басқару технологияларын енгізу үшін жұмыс істеуі керек. Алдағы уақытта осы бағытта нақты қадамдар жасалады деп сенеміз, - деді М.Әшімбаев.

Оның пайымынша, бұл саладағы цифрлық трансформация өңірлік басқарумен тығыз байланысқанда ғана нәтижелі болады. Өйткені ауыл және су шаруашылығы – ең алдымен, нақты аумақтар, аудандар, шаруашылықтар, каналдар мен егіс алқаптары деген сөз.

- Сондықтан жергілікті атқарушы органдар орталықтандырылған ақпараттық жүйелердің жай ғана пайдаланушысы болмауы керек деп есептейміз. Жергілікті мемлекеттік органдар, тиісті құрылымдар осы жұмыстың белсенді қатысушысы болуға тиіс. Әр өңір бойынша цифрлық қамту деңгейі, автоматтандыру дәрежесі, су шығынын азайту сияқты нақты индикаторлар қажет. Су үнемдеу технологияларын енгізу және шаруалар үшін цифрлық сервистердің қолжетімділігі де маңызды мәселе. Әрине, қолға алынған шаралардың тиімділігі, түптеп келгенде, олармен жұмыс істейтін мамандарға тікелей байланысты. Сондықтан агроөнеркәсіп кешені мен су шаруашылығын цифрландыру үшін кадр даярлау – басты мақсаттардың бірі. Осы бағытта мемлекет, жоғары оқу орындары, ғылым және салалық ұйымдар арасындағы байланысты нығайта түскен абзал, - деді Сенат төрағасы.

Айта кетейік, су үнемдеу технологиялары арқылы былтыр 874 млн текше метр су үнемделгенін жазған едік.