Цифрлық теңге ашықтық кепілі

Премьер-министрдің орынбасары – Ұлттық экономика министрі Серік Жұманғариннің төрағалығымен өткен Үкіметтегі кеңесте цифрлық теңгені ен­гізудің қанатқақты жобасын жүзеге асырудың алдын ала қорытындысы мен оны сынақтан өткізу барысында туындайтын мәселелер қаралды.

Қаржы министрлігінің мәлі­метінше, бүгінде цифрлық теңге платформасының мәртебесі мен оның жұмыс істеу тәртібі заңнамалық тұрғыдан бекітілген. Айналысқа 340 млрд цифрлық теңге шығарылған. Оларды пайдалана отырып, 20 қанатқақты жоба мәресіне жетсе, тағы 10-ы жүзеге асырылып жатыр. 50-і іске қосуға дайындалып жатыр.

Қанатқақты жобалар ин­фра­­құрылымдық құры­лыс­ты, бюджеттік кредит­теу мен субсидиялауды, гранттық қаржы­ландыруды, мемлекеттік қолдау шараларын, мемлекеттік сатып алуды, салықтық әкімшілендіруді, сондай-ақ Ұлттық банк пен ква­зимемлекеттік сектор субъек­тілерінің сатып алуларын қамтиды. Цифрлық теңгені міндетті түрде қолдану құны 100 млн теңгеден асатын жобаларға арналған бюджет-тік шығыстардың сегіз ерекшелігі негізінде қарастырылады.

Тамызда тауарларды, дәрілік заттарды, жанар-жағармай ма­териалдары мен басқа да ма­те­риалдық қорларды мемле­кет­тік сатып алу кезінде цифр­лық тең­гені пайдалану жоспарланып отыр.

Кеңеске қатысушылар жобаны одан әрі кеңейтуді тежейтін мәселелерге ерекше назар ­аударды. Бас мердігерден бас­тап түпкілікті орындаушыға дейін бюджет қаражатын пай­да­ланудың қадағалануын қамтамасыз ету негізгі мәселенің бірі болып қала береді. Іс жүзінде қосалқы мердігерлік ұйымдар көбіне цифрлық теңгені пайдалану үшін смарт-келісімшарттар жасасуға дайын емес. Өйткені қолданыстағы заңнамада тиісті талаптар жоқ.

Бұл кедергіні жою үшін Қаржы министрлігі қажетті құқықтық тетікті құруды көз­дейтін тиісті құқықтық актілерге түзетулер пакетін дайындады.