Cl0p хакерлері әлемдегі ең ірі компанияларға шабуыл жасалғанын мәлімдеді

Cl0p хакерлық тобы әлем бойынша 50-ге жуық компанияға ауқымды шабуыл жасағанын мәлімдеді. Қаскөйлер бағдарламалық жасақтамадағы осал тұстарды пайдаланып, корпоративтік деректердің үлкен көлеміне қол жеткізгенін алға тартты, деп хабарлайды Tengrinews.kz тілшісі DW басылымына сілтеме жасап.

Хакерлердің мәлімдемесіне сәйкес зардап шегуі мүмкін компаниялардың арасында нидерландылық Philips, британдық Shell, сондай-ақ америкалық Fiserv пен General Electric бар.

Дегенмен, компаниялардың өздері деректердің жылыстауы қаншалықты ауқымды екенін әзірге растаған жоқ. Philips компаниясы ішкі деректерге қатысты нақты корпоративтік серверге жасалған кибершабуыл әрекетін анықтап, оны оқшаулағанын хабарлады. Компания мәліметінше, клиенттік ортаға зақым келмеген.

Fiserv компаниясы да хакерлердің мәлімдемесінен хабардар екенін айтты. Компания тексеру жүргізді, алайда клиенттердің деректері, банктік шоттар мен транзакциялар, жеке ақпарат немесе операциялық ортаның бұзылғаны туралы белгілерді таппаған.

Cl0p - корпоративтік бағдарламалық жасақтаманың осал тұстарын пайдаланып шабуыл жасаумен және кейіннен бопсалаумен айналысатын киберқылмыстық топ. Бұл топ бұған дейін де кеңінен қолданылатын корпоративтік жүйелерге қатысты ұқсас тактиканы қолданған. Атап айтқанда, Cl0p тобының MOVEit платформасындағы осалдық арқылы жасалған жаппай шабуылдарға қатысы бар деп есептеледі.

Бірқатар басылымдарда Cl0p тобын "орыстілді топ" деп атайды. Сонымен қатар қазіргі шабуылға Ресейдің мемлекеттік құрылымдарының қатысы бар екендігі туралы ашық деректер жоқ.

Google News арқылы жаңалықтарымызды қадағалаңыз